କେନ୍ଦ୍ର ସରକାରଙ୍କ ୱକଫ୍ ଆଇନକୁ ବିରୋଧ କରି ପଶ୍ଚିମବଙ୍ଗର ମୁର୍ଶିଦାବାଦ ଜିଲ୍ଲାରେ ଚାଲିଥିବା ୱକଫ୍ ବିରୋଧୀ ଆନ୍ଦୋଳନ ଭୟଙ୍କର ହିଂସାର ରୂପ ନେଇଛି। ହିଂସାରେ ୩ ଜଣଙ୍କ ମୃତ୍ୟୁ ହୋଇଛି ଏବଂ ୧୮ ଜଣ ପୁଲିସ କର୍ମୀ ଆହତ ହୋଇଛନ୍ତି। ମୁର୍ଶିଦାବାଦ ଜିଲ୍ଲାରେ ହୋଇଥିବା ଏହି ହିଂସା ମାମଲାରେ ୧୫୦ ଜଣ ଗିରଫ ହୋଇଥିବା ବେଳେ ଦଙ୍ଗାକାରୀମାନେ ନିରୀହ ଲୋକଙ୍କ ଉପରେ ସଂଘବଦ୍ଧ ଆକ୍ରମଣ କରୁଥିବାରୁ ବିସ୍ଫୋରକ ସ୍ଥିତି ଉପୁଜିଛି। ଏହି ହିଂସା ଘଟଣା ପାଇଁ ତୃଣମୂଳ କଂଗ୍ରେସ (ଟିଏମସି) ବିଜେପିକୁ ଦାୟୀ କରୁଛି। ସେହିପରି ବିଜେପି ଏହାକୁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୁଷ୍ଟିକରଣ ରାଜନୀତିର ଫଳାଫଳ ବୋଲି କହିଛି। ମୁର୍ଶିଦାବାଦ ହିଂସା ସମ୍ପର୍କରେ ଟିଏମସି ବିଧାୟକ ମଦନ ମିତ୍ର ଏକ ବିବାଦୀୟ ବୟାନ ଦେଇଛନ୍ତି। ଟିଏମସି ବିଧାୟକ ମଦନ ମିତ୍ର କହିଛନ୍ତି, ‘ବିଜେପି ନେତାମାନେ ପଶ୍ଚିମବଙ୍ଗରେ ଅଯଥା କଥା କହି ହିଂସା ସୃଷ୍ଟି କରିବାକୁ ଚାହୁଁଛନ୍ତି। ଯେତେ ଛୋଟ ହିଂସା ହେଉ, ତାହା ସମସ୍ତ ରାଜ୍ୟରେ ଘଟେ। ଏହାର ଦାୟିତ୍ୱ କେନ୍ଦ୍ର ସରକାରଙ୍କ ଉପରେ, ଯିଏ ଏପରି ଏକ ୱାକଫ ଆଇନ ଆଣୁଛନ୍ତି। ୨୦୨୬ ବଙ୍ଗଳା ନିର୍ବାଚନ ପୂର୍ବରୁ, ବିଜେପି ନେତାମାନେ ଦଙ୍ଗା ସୃଷ୍ଟି କରିବାକୁ ଏବଂ ପାକିସ୍ତାନ ସହିତ ଯୁଦ୍ଧ କରିବାକୁ ଚାହୁଁଛନ୍ତି। ଟିଏମସି ବିଧାୟକ ମଦନ ମିତ୍ର କହିଛନ୍ତି, ‘ଦେଶରେ ଯାହା ବି ଦଙ୍ଗା ହେଉଛି, ସେଥିପାଇଁ ଅମିତ ଶାହ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଯୋଗୀ ଆଦିତ୍ୟନାଥ ଦାୟୀ।’ ଯେପର୍ଯ୍ୟନ୍ତ ମମତା ବାନାର୍ଜୀ ଅଛନ୍ତି, ସେପର୍ଯ୍ୟନ୍ତ ପଶ୍ଚିମବଙ୍ଗରେ କୌଣସି ସ୍ଥାନରେ ହିଂସା ହୋଇପାରିବ ନାହିଁ। ମମତା ବାନାର୍ଜୀ ସମସ୍ତଙ୍କୁ ସାଙ୍ଗରେ ନେଇ ଚାଲିଛନ୍ତି।
ଅନ୍ୟପଟେ ବିଜେପି ନେତା ଦିଲୀପ ଘୋଷ କହିଛନ୍ତି, ‘ମୁର୍ଶିଦାବାଦ ଜିଲ୍ଲାକୁ ପଶ୍ଚିମବଙ୍ଗରୁ ଅଲଗା କରିବାର ଷଡଯନ୍ତ୍ର ଚାଲିଛି। ହିନ୍ଦୁ ଅଞ୍ଚଳରେ ପୋଡ଼ାଜଳା ଏବଂ ଭଙ୍ଗାରୁଜା ହେଉଛି। ହିନ୍ଦୁମାନଙ୍କୁ ହତ୍ୟା କରାଯାଇଛି, ତଥାପି ପଶ୍ଚିମବଙ୍ଗର ଡିଜିପି କହୁଛନ୍ତି ଯେ କିଛି ହୋଇନାହିଁ।
