ବିଧାନସଭା ଅଧିବେଶନ ଚାଲିପାରୁନାହିଁ । କଂଗ୍ରେସ ଆନ୍ଦୋଳନ କରୁଛି । ରାଜ୍ୟରେ ଆଇନ କାନୁନ ବ୍ୟବସ୍ଥାକୁ ନେଇ କଂଗ୍ରେସ ଏହି ଆନ୍ଦୋଳନ ଜାରି ରଖିଛି । ବିରୋଧୀ ଦଳର ବିଧାୟକମାନେ କରୁଥିବା ହଙ୍ଗାମା ନେଇ ବାଚସ୍ପତି ସୁରମା ପାଢ଼ୀ ବିବୃତି ରଖିଛନ୍ତି। ସେ କହିଛନ୍ତି, ୭ ତାରିଖ ଗୃହ କାର୍ଯ୍ୟର ଦ୍ବିତୀୟ ପର୍ଯ୍ୟାୟ ଆରମ୍ଭରୁ ବିରୋଧୀ ସଦସ୍ୟ ବିଭିନ୍ନ ଉପାୟରେ ପ୍ରତିବାଦ କରୁଥିଲେ। ଫ୍ଲାଗ କାର୍ଡ, ପୋଷ୍ଟର, ବ୍ୟାନର ଧରି ପ୍ରତିବାଦ କରୁଥିଲେ। ୨୦ ମାର୍ଚ୍ଚରୁ କଳା ବ୍ୟାଜ, କଳା ପୋଷାକ ପରିଧାନ କରି ହୁଇସିଲ ତୂରୀ, ଘଣ୍ଟ ଓ ବଂଶୀ ବଜାଇ ଗୃହକାର୍ଯ୍ୟରେ ବାଧା ପହଞ୍ଚାଇଥିଲେ। ୭ ତାରିଖରୁ ବିରୋଧୀ ସଦସ୍ୟମାନେ ପ୍ରତିବାଦ ଜାରି ରଖିଥିଲେ। ଫ୍ଲାଗ, କାର୍ଡ, ପୋଷ୍ଟର, ବ୍ୟାନର ଧରି ପ୍ରଦର୍ଶନ କରିଥିଲେ। ୨୦ ମାର୍ଚ୍ଚରୁ କଳା ବ୍ୟାଜ, କଳା ପୋଷାକ ପିନ୍ଧି ହୁଇସିଲ, ଘଣ୍ଟ, ବଂଶୀ ବଜାଇ ଅସନ୍ତୋଷ ପ୍ରକାଶ କରୁଥିଲେ। ମୋଟ ୧୨ ଦିନରେ କେବଳ ୨ ଦିନ ମାତ୍ର ପ୍ରଶ୍ନୋତ୍ତର ଅଧିବେଶନ ଚାଲିପାରିଛି। ୩୯ ଘଣ୍ଟା ୨ ମିନିଟ ଗୃହ କାର୍ଯ୍ୟ ବାଧା ପାଇଛି। ମାର୍ଚ୍ଚ ୧୦, ୧୩, ୨୪, ୨୫ ତାରିଖରେ ସର୍ବଦଳୀୟ ବୈଠକ ଡକାଯାଇଥିଲେ ତଥାପି ବିଶୃଙ୍ଖଳା ଜାରି ରହିଥିଲା। ୨୧ ମାର୍ଚ୍ଚରେ ଉପବାଚସ୍ପତି ବିଶୃଙ୍ଖଳିତ ଆଚରଣ ବନ୍ଦ କରିବାକୁ ରୁଲିଂ ଦେଇଥିଲେ ।
୨୬ ମାର୍ଚ୍ଚରେ ୧୨ ଜଣ କଂଗ୍ରେସ ସଦସ୍ୟଙ୍କୁ ନିଲମ୍ବନ କରାଯାଇଥିଲା। ନିଲମ୍ବନ ସତ୍ତ୍ୱେ ଗୃହ ପରିତ୍ୟାଗ ନକରି ଧାରଣା ଜାରି ରଖିଥିଲେ। ରାତ୍ର ୯ଟାରେ ସୁରକ୍ଷା କର୍ମୀ ଓ ମାର୍ଶଲଙ୍କୁ ଆକ୍ରମଣ କରାଯାଇଥିଲା, ଯେଉଁଥିରେ କିଛି ସଦସ୍ୟ ଆହତ ହୋଇଥିଲେ। ରାତ୍ର ୨ଟାରେ କିଛି ବିଧାୟକଙ୍କୁ ବାହାର କରାଯାଇଥିଲା। ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି, “ବାଚସ୍ପତିଙ୍କ ବିବୃତି ଏକପାଖିଆ ଅଟେ। ଆମ୍ବେଦକରଙ୍କ ପ୍ରତିମୂର୍ତ୍ତୀରେ ପୁଷ୍ପମାଲ୍ୟ ଅର୍ପଣ କରିବାକୁ ଯିବାକୁ ଚାହୁଥିଲେ, କିନ୍ତୁ ସୁରକ୍ଷା କର୍ମୀ ମନ୍ଦ ବ୍ୟବହାର କଲେ।”
ସେପଟେ ବିଜେପି କହିଛି ବିଧାନସଭା ହେଉଛି ପବିତ୍ର ଗୃହ, ଯେଉଁଠି ରାଜ୍ୟର ବିକାଶ ପାଇଁ ନୀତି ପ୍ରଣୟନ ହେବ କଥା। କିନ୍ତୁ ସେଠି ନିଜର ରାଜନୈତିକ ସ୍ୱାର୍ଥକୁ ଚରିତାର୍ଥ କରିବା ପାଇଁ ଦୀର୍ଘ ଦିନ ହେବ ହାଇ ଡ୍ରାମା କରାଯାଉଛି।
ଗତ ୭ ମାର୍ଚ୍ଚ ତାରିଖ ଠାରୁ ଏଭଳି ଅଭାବନୀୟ ପରିସ୍ଥିତି ଦେଖିବାକୁ ମିଳୁଛି, ଯାହା କି ବିଧାନସଭା ପରମ୍ପରାରେ କେବେ ବି ଗ୍ରହଣୀୟ ନୁହେଁ। ଯେତେବେଳେ ଏହା ଅସହଣିୟ ହେଲା ସେତେବେଳେ କଂଗ୍ରେସ ଦଳର ଜଣେ ବରିଷ୍ଠ ବିଧାୟକଙ୍କୁ ବାଚସ୍ପତି ନିଜର ଅନିଚ୍ଛା ସତେ ନିଲମ୍ବନ କଲେ।
ଆଶା କରାଯାଉ ଥିଲା ଯେ ତାହା ପରେ କଂଗ୍ରେସ ବିଧାୟକମାନେ ନିଜ ଆଚରଣ ଉଚ୍ଚାରଣରେ ପରିବର୍ତ୍ତନ ଆଣିବେ। କିନ୍ତୁ କଂଗ୍ରେସ ବିଧାୟକମାନେ ଏହା କଲେ ନାହିଁ।
ସାମ୍ବାଦିକ ସମ୍ମିଳନୀରେ ଆଇନ୍ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ଏଭଳି ଉଦ୍ବେଗ ପ୍ରକାଶ କରିଛନ୍ତି। ସେ କହିଛନ୍ତି ଯେ, କଂଗ୍ରେସ ରାଜନୈତିକ ଚକ୍ରାନ୍ତ କରି ଓଡ଼ିଶାର ବିଧାନସଭାକୁ ବନ୍ଦ କରିବାକୁ ଷଡ଼ଯନ୍ତ୍ର କରୁଛି।
ସୂଚନାଯୋଗ୍ୟ ମହିଳାଙ୍କ ସୁରକ୍ଷା ଓ ନ୍ୟାୟ ଦେବାକୁ ବିଧାନସଭା ଗୃହ କମିଟି ଗଠନ କରିବା ଦାବି କରୁଛି କଂଗ୍ରେସ । ଏହି ଦାବିରେ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ୭ଦିନ ପାଇଁ ନିଲମ୍ବିତ ହୋଇଥିଲେ।
ଏହାକୁ ବିରୋଧ କରି କଂଗ୍ରେସ ବିଧାୟକମାନେ ଘଣ୍ଟ, ଗିନି, ତୁରୀ ବଜାଇ ବିରୋଧ କରୁଥିଲେ। ବାଚସ୍ପତି ଓ ଉପବାଚସ୍ପତିଙ୍କ ତାଗିଦ୍ ନଶୁଣି ନିଜ ଜିଦ୍ରେ ଅଟଳ ଥିଲେ।
ଶେଷରେ ଗତ କାଲି ଅପରାହ୍ଣରେ ବାଚସ୍ପତି କଂଗ୍ରେସର ୧୨ଜଣ ବିଧାୟକଙ୍କୁ ଚଳିତ ଅଧିବେଶନର ୭ଟି କାର୍ଯ୍ୟ ଦିବସ ଅର୍ଥାତ୍ ଅଧିବେଶନ ଶେଷ ହେବା ପର୍ଯ୍ୟନ୍ତ ନିଲମ୍ବନ କରିଥିଲେ । ଏହା ପରେ ବିଧାୟକ ରମେଶ ଜେନା, ତାରା ବାହିନୀପତିଙ୍କୁ ମଧ୍ୟ ନିଲମ୍ବନ କରିଥିଲେ । ଏହାକୁ ନେଇ ଶାସକ ଦଳ ଏବଂ ବିରୋଧୀଙ୍କ ମଧ୍ୟରେ ଲଢ଼େଇ ଚାଲିଛି । ତେବେ ବିଧାନସଭା ନଚାଲିବା ନେଇ ବୁଦ୍ଧିଜୀବୀମାନେ ପ୍ରଶ୍ନ କରିଛନ୍ତି । ସାଧାରଣଙ୍କ ଅର୍ଥକୁ ଏପରି ନଷ୍ଟ କରାଯିବା ଉଚିତ ନୁହେଁ ବୋଲି ଆଲୋଚନା ହେଉଛି ।
