ୟେମେନରେ ଇରାନ ସମର୍ଥିତ ହୁତି ବିଦ୍ରୋହୀଙ୍କ ଆଡ଼ା ଓ କମାଣ୍ଡ ସେଣ୍ଟର ଉପରେ ଆମେରିକା ବଡ଼ ଧରଣର ଆକ୍ରମଣ କରିଛି। ଶକ୍ତିଶାଳୀ ବୋମାମାଡ଼ରେ ହୁତି ଶିବିର ଓ କମାଣ୍ଡ ସେଣ୍ଟର ଗତକାଲି ଧ୍ବସ୍ତ ହୋଇଯାଇଥିବା ବେଳେ ଏଥିରେ ଅତି କମରେ ୩୧ ଜଣଙ୍କର ମୃତ୍ୟୁ ଘଟିଛି ଏବଂ ୧୦୦ରୁ ଅଧିକ ଆହତ ହୋଇଛନ୍ତି। ହୁତି ଆତଙ୍କବାଦୀମାନେ ଯଦି ଇରାନ ସମର୍ଥନରେ ସେମାନଙ୍କ ହିଂସା ଜାରି ରଖନ୍ତି, ତା’ହେଲେ ସେମାନଙ୍କ ଉପରେ ଆହୁରି ଭୟାନକ ଆକ୍ରମଣ ହେବ ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆଜି ଚେତାବନୀ ଦେଇଛନ୍ତି। ହୁତିର ମୁଖ୍ୟ ସମର୍ଥକ ଇରାନକୁ କଡ଼ା ଚେତାବନୀ ଦେଇ ଟ୍ରମ୍ପ କହିଛନ୍ତି ଯେ ଇରାନ ତୁରନ୍ତ ଏହି ଆତଙ୍କୀ ସଂଗଠନକୁ ସହାୟତା ବନ୍ଦ ନକଲେ ପରିଣାମ ଭୋଗିବାକୁ ବାଧ୍ୟ ହେବ। ସେ ସତର୍କ କରାଇ ଦେଇଛନ୍ତି ଯେ ଆମେରିକା ପ୍ରତି କୌଣସି ବିପଦ ଆସିଲେ ଏହାର ଗମ୍ଭୀର ପରିଣାମ ହେବ ଏବଂ କୌଣସି ଶତ୍ରୁ ଏଥିରୁ ନିସ୍ତାର ପାଇବେ ନାହିଁ । ସମସ୍ତ ହୁଥି ଆତଙ୍କବାଦୀଙ୍କ ପାଇଁ ସମୟ ସରିଯାଇଛି ଏବଂ ସେମାନଙ୍କୁ ଆଜିଠାରୁ ଆକ୍ରମଣ ବନ୍ଦ କରିବାକୁ ହେବ। ଯଦି ସେମାନେ ଏହା ନ କରନ୍ତି, ତା’ହେଲେ ସେମାନେ କେବେ ଦେଖିନଥିବା ଭୟାନକ ଆକ୍ରମଣକୁ ସାମ୍ନା କରିବେ ବୋଲି ଟ୍ରମ୍ପ କହିଛନ୍ତି।
ଜାନୁଆରିରେ ଟ୍ରମ୍ପ ରାଷ୍ଟ୍ରପତି ହେବା ପରେ ମଧ୍ୟପ୍ରାଚ୍ୟରେ ଚାଲିଥିବା ଆମେରିକାର ସାମରିକ ଅଭିଯାନ ବ୍ୟାପକ ହୋଇଛି। ପରମାଣୁ ଆଲୋଚନା ପାଇଁ ତେହେରାନ ଉପରେ ଚାପ ପକାଇବା ପାଇଁ ଆମେରିକା ନିଜ ଆର୍ଥିକ କଟକଣାକୁ ଜୋରଦାର କରିଥିବା ବେଳେ ହୁତି ଉପରେ ଏଭଳି ପ୍ରଚଣ୍ଡ ଆକ୍ରମଣ ମଧ୍ୟପ୍ରାଚ୍ୟ ଉତ୍ତେନାକୁ ବଢ଼ାଇ ଦେଇଛି। ଅନ୍ୟପକ୍ଷରେ ହୁତି ସଂଗଠନର ରାଜନୈତିକ ବ୍ୟୁରୋ ଆମେରିକାର ଆକ୍ରମଣକୁ ‘ଯୁଦ୍ଧ ଅପରାଧ’ ବୋଲି ବର୍ଣ୍ଣନା କରିଛି। ୟେମେନ ସଶସ୍ତ୍ର ବାହିନୀ ଉତ୍ତେଜନାର ମୁକାବିଲା ପାଇଁ ସମ୍ପୂର୍ଣ୍ଣ ପ୍ରସ୍ତୁତ ଅଛି ବୋଲି ମଧ୍ୟ ଏକ ବିବୃତିରେ କହିଛି। ସୂଚନାଯୋଗ୍ୟ, ଆମେରିକୀୟ ଜାହାଜ ଉପରେ ହୁତି ବିଦ୍ରୋହୀମାନେ ଲଗାତାର ଆକ୍ରମଣ କରୁଥିବାରୁ ଏହା ବିରୋଧରେ ଏବେ ଆମେରିକାର ସାମାରିକ କାର୍ଯ୍ୟାନୁଷ୍ଠାନ ତୀବ୍ର ହୋଇଛି। ଆମେରିକା ଆକ୍ରମଣ ନେଇ ସନାର ବାସିନ୍ଦା କହିଛନ୍ତି ଯେ ଆକ୍ରମଣ ଅତି ମାରାତ୍ମକ ଥିଲା ଏବଂ ଭୂମିକମ୍ପ ଭଳି ଅନୁଭବ ହୋଇଥିଲା। ଏହି ଆକ୍ରମଣରେ ଅନେକ ସୁଉଚ୍ଚ ଅଟ୍ଟାଳିକା ମାଟିରେ ମିଶିଯାଇଛି
