ଚଳିତ ବର୍ଷ ଶେଷରେ ବିହାର ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏଥିପାଇଁ ବିଭିନ୍ନ ଦଳମାନେ ଏବେ ପ୍ରସ୍ତୁତି ଆରମ୍ଭ କରିଦେଲେଣି । ଏହି ସମୟରେ, ଜଣେ ଏନଡିଏ ନେତା ବିହାର ନିର୍ବାଚନର ଫଳାଫଳକୁ ନେଇ ମଧ୍ୟ ଭବିଷ୍ୟବାଣୀ କରିଛନ୍ତି। ଜନତା ଦଳ ୟୁନାଇଟେଡ୍ ନେତା ସଞ୍ଜୟ ଝା କହିଛନ୍ତି ଯେ ଏଥର ଏନଡିଏ ୨୦୧୦ ମସିହାରେ ଜିତିଥିବା ଆସନର ରେକର୍ଡ ଭାଙ୍ଗିବ।
ଜେଡିୟୁର କାର୍ଯ୍ୟକାରୀ ସଭାପତି ସଞ୍ଜୟ ଝା ଏକ ସାକ୍ଷାତକାରରେ ସ୍ପଷ୍ଟ ଭାବରେ କହିଥିଲେ ଯେ ୨୦୧୦ ବିଧାନସଭା ନିର୍ବାଚନରେ ଏନଡିଏ ୨୦୬ଟି ଆସନ ଜିତିଥିଲା, କିନ୍ତୁ ଏଥର ଏହା ଆହୁରି ଅଧିକ ଆସନ ପାଇବ। ଆପଣଙ୍କୁ କହି ରଖୁଛୁ ଯେ ବିହାର ବିଧାନସଭାରେ ୨୪୩ଟି ଆସନ ଅଛି। ଏଠାରେ ବହୁମତ ପାଇଁ ୧୨୨ଟି ଆସନ ଆବଶ୍ୟକ। ୨୦୨୦ ମସିହାରେ ହୋଇଥିବା ନିର୍ବାଚନରେ ଏନଡିଏ ୧୨୫ଟି ଆସନ ପାଇଥିଲା। ଏଥିରେ ବିଜେପି ୭୪ଟି ଆସନ ଏବଂ ଜେଡିୟୁ ୪୩ଟି ଆସନ ଜିତିଥିଲା। ବିଜେପି ତୁଳନାରେ କମ୍ ଆସନ ଥିବା ସତ୍ତ୍ୱେ, ମୁଖ୍ୟମନ୍ତ୍ରୀ ଭାବେ ନୀତିଶ କୁମାର ଦାୟିତ୍ୱରେ ଥିଲେ | ଅନ୍ୟପଟେ ମହାଗଠବନ୍ଧନ ୧୧୦ଟି ଆସନ ଜିତିଥିଲା। ଏଥିରେ କଂଗ୍ରେସ, ଆରଜେଡି ଏବଂ କମ୍ୟୁନିଷ୍ଟ ଦଳଗୁଡ଼ିକ ସାମିଲ ଥିଲେ। ଲାଲୁ ପ୍ରସାଦ ଯାଦବଙ୍କ ଆରଜେଡିର ପ୍ରଦର୍ଶନ ସର୍ବୋତ୍ତମ ଥିଲା। ତେଜସ୍ୱୀ ଯାଦବଙ୍କ ନେତୃତ୍ୱରେ, ଆରଜେଡି ୭୫ଟି ଆସନ ଜିତିଥିଲା, ଯେତେବେଳେ କଂଗ୍ରେସ ମାତ୍ର ୧୯ଟି ଆସନ ପାଇଥିଲା।
୨୦୨୪ ଲୋକସଭା ନିର୍ବାଚନରେ, ଇଣ୍ଡିଆ ମେଣ୍ଟ ଉପରେ ଏନଡିଏର ପ୍ରଭାବ ଅଧିକ ପଡିଥିଲା। ୪୦ଟି ବିଧାନସଭା ଆସନ ମଧ୍ୟରୁ, ଏନ୍ଡିଏ ୩୧ଟି ଆସନ ଜିତିଥିଲା ବେଳେ ଇଣ୍ଡିଆ ମେଣ୍ଟକୁ ମାତ୍ର ୯ଟି ଆସନରେ ସନ୍ତୁଷ୍ଟ ହେବାକୁ ପଡିଥିଲା। ଆରଜେଡି ୨୩ଟି ଆସନରେ ପ୍ରତିଦ୍ୱନ୍ଦ୍ୱିତା କରି ମାତ୍ର ୪ଟିରେ ଜିତିଥିଲା, ଯେତେବେଳେ କଂଗ୍ରେସ ୯ଟି ଆସନରେ ପ୍ରତିଦ୍ୱନ୍ଦ୍ୱିତା କରି ୩ଟିରେ ଜିତିଥିଲା।
