ବିହାର ରାଜନୀତି ପ୍ରତି କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ବଢୁଥିବା ଆଗ୍ରହ, ରାଜନୈତିକ ପଣ୍ଡିତମାନଙ୍କୁ ବିହାର ଉପରେ ନଜର ରଖିବାକୁ ବାଧ୍ୟ କରିଛି । ମହାରାଷ୍ଟ୍ରରେ ମହାୟୁତି ସରକାର ଗଠନ ହେବା ପରେ, ଅମିତ ଶାହା ଡିସେମ୍ବର ୨୦୨୪ରେ କହିଥିଲେ ଯେ, ବିହାରରେ ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବେ ସେନେଇ ସଂସଦୀୟ ବୋର୍ଡ ନିଷ୍ପତ୍ତି ନେବ । ଆଉ ଏବେ ଶାହା କହିଛନ୍ତି ଯେ, ନିର୍ବାଚନ ପାଖେଇ ଆସିଲେ ସେ ବିହାରରେ ଡେରା ପକାଇବେ । ତେବେ ପ୍ରଥମ ଥର ପାଇଁ ଶାହାଙ୍କ ବୟାନ ବିହାର ରାଜନୀତିରେ ହଇଚଇ ସୃଷ୍ଟି କରିଛି ।

ଜେଡିୟୁର ରାଷ୍ଟ୍ରୀୟ କାର୍ଯ୍ୟକାରୀ ସଭାପତି ସଞ୍ଜୟ କୁମାର ଝା ଉପସ୍ଥିତ ଥିବା ଏହି କାର୍ଯ୍ୟକ୍ରମରେ ଅମିତ ଶାହା ବିହାରରେ ତାଙ୍କ ଡେରା ପକାଇବା ବିଷୟରେ କହିଥିଲେ। କେବଳ ଏତିକି ନୁହେଁ, ସେ ଏହା ମଧ୍ୟ କହିଥିଲେ ଯେ, ଅଯୋଧ୍ୟାରେ ରାମ ମନ୍ଦିର ନିର୍ମାଣ ହୋଇଛି, ଏବେ ମାତା ସୀତାଙ୍କ ମନ୍ଦିର ମଧ୍ୟ ମିଥିଳାରେ ନିର୍ମାଣ ହେବ ।

ତେବେ ଗଲା ତିନି ମାସ ମଧ୍ୟରେ ବିହାର ସମ୍ପର୍କରେ ଏହା ଅମିତ ଶାହାଙ୍କର ଦ୍ୱିତୀୟ ବକ୍ତବ୍ୟ। ପ୍ରଥମ ଥରରେ ସେ NDAର ମୁଖ୍ୟମନ୍ତ୍ରୀ ଚେହେରା ସମ୍ପର୍କରେ ବୟାନ ଦେଇଥିଲେ । ଯାହାକୁ ନେଇ JDU ଲୋକଙ୍କ ମଧ୍ୟରେ ଆକ୍ରୋଶ ଦେଖିବାକୁ ମିଳିଥିଲା । ହେଲେ ଏବେ ଶାହାାଙ୍କ ଡେରା ପକାଇବା ବୟାନ, ବିହାର ରାଜନୀତିକୁ କେଉଁ ମୋଡ ଦେଉଛି ତାକୁ ନେଇ ଚର୍ଚ୍ଚା ବଢିଛି ।

ଅମିତ ଶାହାଙ୍କୁ ବିଜେପିର ନିର୍ବାଚନ ରଣନୀତିକାର କୁହାଯାଏ। ବିଭିନ୍ନ ରାଜ୍ୟଗୁଡ଼ିକରେ ବିଜେପିର ନିରନ୍ତର ବିଜୟ ପଛରେ ଶାହାଙ୍କ ରଣନୀତି ମୁଖ୍ୟ କାରଣ ହୋଇଛି। ୨୦୧୭ରେ ଅମିତ ଶାହାଙ୍କୁ ଉତ୍ତର ପ୍ରଦେଶ ନିର୍ବାଚନର ଦାୟିତ୍ୱ ଦିଆଯାଇଥିଲା । ଆଉ ସେ ପ୍ରାୟ ଦୁଇ ବର୍ଷ ପୂର୍ବେ ସେଠାରେ ଶିବିର ସ୍ଥାପନ କରିଥିଲେ। ବୁଥ୍ ସ୍ତରରେ ତାଙ୍କର ନିର୍ବାଚନ ପରିଚାଳନା ବହୁତ ପ୍ରଭାବଶାଳୀ ଥିଲା। ଯାହାଫଳରେ କି ୟୁପିରେ ବିଜେପି ସରକାର ଗଠନ ହୋଇଥିଲା। ଏବେ ଯଦି ସେ ବିହାରରେ ଶିବିର କରନ୍ତି, ତେବେ ଏହାର ଅର୍ଥ କଣ ହେଇପାରେ, ତାର ଅଙ୍କ କଷିବା ଆରମ୍ଭ କରିଛନ୍ତି ରାଜନୈତିକ ପଣ୍ଡିତମାନେ ।