ପୁଣି ଚର୍ଚ୍ଚାକୁ ଫେରିଲେ ବଲିଉଡ୍ ଅଭିନେତା ବବି ଦେଓଲ୍। ୯୦ ଦଶକରେ ଅନେକ ବଡ଼ ବଜେଟ୍ର ଫିଲ୍ମରେ କାମ କରି ନିଜର ସ୍ବତନ୍ତ୍ର ପରିଚୟ ଗଢ଼ିଥିବା ଷ୍ଟାର୍ସନ୍ ବବିଙ୍କୁ ଗତ କିଛି ବର୍ଷ ହେଲାଣି ଭଲ ଫିଲ୍ମରେ ଦେଖିବାକୁ ମିଳୁ ନଥିଲା। କୌଣସି ନିର୍ମାତା ବା ନିର୍ଦ୍ଦେଶକ ତାଙ୍କୁ ଫିଲ୍ମରେ ନେବାକୁ ଚାହୁ ନଥିଲେ। ଏଭଳି ସ୍ଥିତିରେ ସେ ତାଙ୍କର ଚମକ ହରାଇସାରିଛନ୍ତି ବୋଲି ଭାବିସାରିଥିଲେ। ହେଲେ ଏହି ସମୟରେ ତାଙ୍କ ଉପରେ ବିଶ୍ବାସ ସ୍ଥାପନ କରି ‘ଆଶ୍ରମ’ ଭଳି ଏକ ୱେବ୍ସିରିଜ୍ ଅଫର୍ ଦେଇଥିଲେ ଜଣାଶୁଣା ନିର୍ଦ୍ଦେଶକ ପ୍ରକାଶ ଝା। ନିକଟରେ ଏହି ୱେବ୍ସିରିଜ୍ର ତୃତୀୟ ସିଜିନ୍ ରିଲିଜ୍ ହୋଇସାରିଥିବା ବେଳେ ଚାରିଆଡ଼େ ବବି ଦେଓଲ୍ ଓରଫ୍ ବାବା ନିରାଲାଙ୍କ ପ୍ରଶଂସା କରାଯାଉଛି।
ସଫଳତା ମିଳିବା ପରେ ବବି କହିଛନ୍ତି ଯେ, “ଆଶ୍ରମ ମୋ ଜୀବନକୁ ବଦଳାଇ ଦେଇଛି। ଏଥିରେ ଲୋକମାନେ ମୋତେ ଏକ ଭିନ୍ନ ଚରିତ୍ରରେ ଦେଖିଲେ। ଯେତେବେଳେ ମୋ ଜୀବନରେ ଆଉ କିଛି ବାକି ନଥିଲା, କେହି ମୋତେ ବିଶ୍ୱାସ କରୁ ନଥିଲେ, ସେତେବେଳେ ପ୍ରକାଶଜୀ ମୋତେ ବିଶ୍ୱାସ କରି ଏହି ଚରିତ୍ର ଦେଇଥିଲେ। ବାବା ନିରାଲା ଚରିତ୍ର ନିଭାଇବା ମୋ ପାଇଁ ସହଜ ନଥିଲା। କାରଣ ଏଭଳି ଚରିତ୍ରରେ ମୁଁ ପୂର୍ବରୁ କେବେ ଅଭିନୟ କରି ନଥିଲି। ପ୍ରଥମେ ମୋତେ ବହୁତ ଲାଜ ଲାଗିଥିଲା। ହେଲେ ଏବେ ଏତେ ପ୍ରଶଂସା ମିଳୁଥିବା ଦେଖି ଖୁସି ଲାଗୁଛି। ମୁଁ ବର୍ତ୍ତମାନ ବୟସର ଏପରି ପର୍ଯ୍ୟାୟରେ ପହଞ୍ଚିଛି, ଯେଉଁଠାରେ କେଉଁ ଅଭିନେତା ମୁଖ୍ୟ ଭୂମିକାରେ ଅଭିନୟ କରୁଛନ୍ତି ତାହା ମୋ ପାଇଁ ଗୁରୁତ୍ୱ ରଖୁନାହିଁ, ବରଂ ମୁଁ କେଉଁ ଚରିତ୍ରରେ ଅଭିନୟ କରୁଛି ତାହା ମୋ ପାଇଁ ଗୁରୁତ୍ୱପୂର୍ଣ୍ଣ। ଅନେକ ଅଭିନେତାଙ୍କ ପାଇଁ ଓଟିଟି ପ୍ଲାଟ୍ଫର୍ମ ଏକ ଆଶୀର୍ବାଦ ପାଲଟିଛି।” ୨୦୨୩ ମସିହାରେ ବବିଙ୍କୁ ସନ୍ଦୀପ ରେଡ୍ଡୀ ଭାଙ୍ଗାଙ୍କ ନିର୍ଦ୍ଦେଶିତ ‘ଆନିମଲ୍’ରେ ଦେଖିବାକୁ ମିଳିଥିଲା। ଭୂମିକା ଛୋଟ ହୋଇଥିଲେ ହେଁ ସିନେପ୍ରେମୀଙ୍କୁ ବବିଙ୍କ ଅଭିନୟ ପସନ୍ଦ ଆସିଥିଲା।
