ଗତ କିଛି ଦିନ ଭିତରେ କଂଗ୍ରେସ ଭିତରେ ହିନ୍ଦୁତ୍ବ କୁ ନେଇ ଭିନ୍ନ ମତ ଦେଖାଯାଇଛି । କିଛି ନେତା ମହାକୁମ୍ଭ ଯାଇ ସ୍ନାନ କରିଛନ୍ତି । ଅନେକ ରାମ ମନ୍ଦିରକୁ ସମର୍ଥନ କରିଛନ୍ତି । ଏହାକୁ ନେଇ କିଛି ରାଜ୍ୟରେ ନେତାଙ୍କ ମଧ୍ୟରେ କନ୍ଦଳ ଦେଖାଯାଇଛି ।

ଲୋକସଭା ଓ କିଛି ରାଜ୍ୟର ବିଧାନସଭା ନିର୍ବାଚନରେ କଂଗ୍ରେସ ଲଗାତାର ନୈରାଶ୍ୟଜନକ ପ୍ରଦର୍ଶନ ପରେ ଏବେ ନେତାଙ୍କ ବିଚାରଧାରାକୁ ନେଇ ବିବାଦ ଆରମ୍ଭ ହୋଇଛି । ଯାହା ଦଳକୁ ନିରୁତ୍ସାହିତ  କରିଛି ସେତିକି ଚିନ୍ତାରେ ପକାଇଛି । ଶଶି ଥରୁରଙ୍କ ମନ୍ତବ୍ୟ ଦଳ ପାଇଁ ଚିନ୍ତାର କାରଣ ହୋଇଛି ।

ତେଣୁ ଆଉ ବିଳମ୍ବ ନ କରି ମିଶନ 2026 ପାଇଁ ଅଣ୍ଟାଭିଡ଼ିଛି ଦଳ । କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ  ଓ ସାଂସଦ ରାହୁଲ ଗାନ୍ଧୀଙ୍କ ମିଳିତ ଅଧ୍ୟକ୍ଷତାରେ  ବସିଛି ରୁଦ୍ଧଦ୍ବାର ବୈଠକ  । ଆଗାମୀ ନିର୍ବାଚନରେ ଏକ ହୋଇ ଲଢ଼ିବାକୁ ନେଇ ଏହି ବୈଠକ ଚାଲିଛି ।

ଉଭୟ କେରଲ ଓ ଆସାମରେ 10 ବର୍ଷ ହେବ ଶାସନରେ ନାହିଁ କଂଗ୍ରେସ । ଆସାମକୁ ବିଜେପି କବଜା କରିଛି ଓ କେରଲରେ ଲେଫ୍ଟ ପାର୍ଟିର ସରକାର । ଲୋକଭସା ନିର୍ବାଚନରେ 99 ଆସନ ଜିତିବା ପରେ ଦଳର ମନୋବଳ ବଢିଥିଲା । ମାତ୍ର ହରିୟାଣା,ମହାରାଷ୍ଟ୍ର, ଦିଲ୍ଲୀ ନିର୍ବାଚନରେ ଶୋଚନୀୟ ପରାଜୟ ନିରାଶ କରିଛି ।