ୟୁକ୍ରେନ ଯୁଦ୍ଧ ପ୍ରସଙ୍ଗରେ ସାଉଦି ଆରବରେ ଆମେରିକା ଏବଂ ରୁଷିଆ ଅଧିକାରୀମାନେ ସାକ୍ଷାତ କରିଛନ୍ତି । ମଙ୍ଗଳବାର ଦିନ ରିୟାଦରେ ଅନୁଷ୍ଠିତ ବୈଠକରେ ରୁଷିଆର ପ୍ରତିନିଧିତ୍ବ ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭ ଏବଂ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବୈଦେଶିକ ନୀତି ପରାମର୍ଶଦାତା ୟୁରି ଉଶାକୋଭ କରିଥିଲେ ଆମେରିକା ପକ୍ଷରୁ ବୈଦେଶିକ ମନ୍ତ୍ରୀ ମାର୍କୋ ରୁବିଓ ଜାତୀୟ ସୁରକ୍ଷା ପରାମର୍ଶଦାତା ମାଇକ ୱାଲ୍ଜ ଏବଂ ପଶ୍ଚିମ ଏସିଆ ପାଇଁ ଡ଼ୋନାଲ୍ଟ ଟ୍ରମ୍ପଙ୍କ ସ୍ବତନ୍ତ୍ର ପ୍ରତିନିଧି ଷ୍ଟିଭ ଓ୍ବିଟକଫ ବୈଠକରେ ଉପସ୍ଥିତ ଥିଲେ ଏହି ବୈଠକକୁ ୟୁକ୍ରେନକୁ ନିମନ୍ତ୍ରଣ କରାଯାଇ ନାହିଁ । ଯାହାକୁ ନେଇ ୟୁରୋପ ପକ୍ଷରୁ ଚିନ୍ତା ପ୍ରକାଶ କରାଯାଇଛି ।
ଫାର୍ଷ୍ଟପୋଷ୍ଟ ରିପୋର୍ଟ ଅନୁଯାୟୀ, ୟୁକ୍ରେନ ଉପରେ ରୁଷିଆ ଆକ୍ରମଣର ତିନି ବର୍ଷ ପରେ ସାଉଦି ଆରବରେ ଏହି ବୈଠକ ହେଉଛି। ଶାନ୍ତି ଚୁକ୍ତିନାମାରେ ଆମେରିକାର ଭୂମିକା ଯୋଗୁ ଏହାକୁ ଗୁରୁତ୍ୱପୂର୍ଣ୍ଣ ବିବେଚନା କରାଯାଉଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ମଧ୍ୟରେ ସମ୍ପ୍ରତି ହୋଇଥିବା ଫୋନ୍ ବାର୍ତ୍ତାଳାପ ପରେ ଆମେରିକାର ବୈଦେଶିକ ବିଭାଗ ଏବଂ ରୁଷିଆ ଅଧିକାରୀଙ୍କ ମଧ୍ୟରେ ଆଲୋଚନା ହେଉଛି। ଫୋନରେ ଉଭୟ ନେତା ୟୁକ୍ରେନ ନେଇ ତୁରନ୍ତ ଶାନ୍ତି ଆଲୋଚନା ଆରମ୍ଭ କରିବାକୁ ରାଜି ହୋଇଥିଲେ।
ୟୁରୋପୀୟ ସଂଘକୁ ମଧ୍ୟ ଆଲୋଚନାରେ ସାମିଲ କରାଯାଇ ନାହିଁ। ୟୁରୋପୀୟ ନେତାମାନେ ଏହାକୁ ବିରୋଧ କରିଛନ୍ତି ଏବଂ ଯେକୌଣସି ଶାନ୍ତି ଆଲୋଚନାରେ ସେମାନଙ୍କର ଅଂଶଗ୍ରହଣର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି। ୟୁରୋପୀୟ ସଂଘ କହିଛି, ଏକ ନିରପେକ୍ଷ ଏବଂ ସ୍ଥାୟୀ ଶାନ୍ତି ପାଇଁ ସେମାନଙ୍କର ଉପସ୍ଥିତି ଆବଶ୍ୟକ। ବ୍ରିଟିଶ ପ୍ରଧାନମନ୍ତ୍ରୀ କିର ଷ୍ଟାର୍ମର ତାଙ୍କ ବିବୃତିରେ କହିଛନ୍ତି ଯେ, ୟୁକ୍ରେନ ଏବଂ ରୁଷିଆ ମଧ୍ୟରେ ସ୍ଥାୟୀ ଶାନ୍ତି ପାଇଁ ଆମେରିକାର ସୁରକ୍ଷା ଗ୍ୟାରେଣ୍ଟି ଆବଶ୍ୟକ।
ଏହି ବୈଠକ ଏଥିପାଇଁ ମଧ୍ୟ ଗୁରୁତ୍ୱପୂର୍ଣ୍ଣ କାରଣ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କ୍ଷମତାକୁ ଆସିବା ପରେ, ଆମେରିକାର ରୁଷିଆକୁ ଅଲଗା କରିବା ପାଇଁ ନିଜ ନୀତିରେ ପରିବର୍ତ୍ତନ ଆଣିଛି। ପୂର୍ବରୁ, ରୁଷିଆର ଆକ୍ରମଣ ପରେ ଆମେରିକା ୟୁକ୍ରେନକୁ ଅଲଗା କରିବାକୁ ଚେଷ୍ଟା କରୁଥିଲା। ଏବେ ଉଭୟ ଦେଶର ଉଚ୍ଚ ପଦାଧିକାରୀଙ୍କ ମଧ୍ୟରେ ସାକ୍ଷାତ୍ ହୋଇଛି। ଏହି ଆଲୋଚନା ଡୋନାଲ୍ଡ ଟ୍ରମ୍ପ ଏବଂ ଭ୍ଲାଦିମିର ପୁଟିନଙ୍କ ମଧ୍ୟରେ ସାକ୍ଷାତ ପାଇଁ ମଧ୍ୟ ପଥ ପ୍ରଶସ୍ତ କରିବ ବୋଲି କୁହାଯାଉଛି।
ପୁଟିନଙ୍କ ବୈଦେଶିକ ନୀତି ପରାମର୍ଶଦାତା ଉଷାକୋଭ କହିଛନ୍ତି , ଆଲୋଚନା ସମ୍ପୂର୍ଣ୍ଣ ଦ୍ୱିପାକ୍ଷିକ ଥିଲା। ଏଥିରେ ୟୁକ୍ରେନୀୟ ଅଧିକାରୀମାନେ ଅନ୍ତର୍ଭୁକ୍ତ ନୁହଁନ୍ତି। ତଥାପି, ଡୋନାଲ୍ଡ ଟ୍ରମ୍ପ ୟୁକ୍ରେନକୁ ଆଶ୍ୱାସନା ଦେଇଛନ୍ତି ଯେ, ୟୁକ୍ରେନକୁ ଆଲୋଚନାରେ ସାମିଲ କରାଯିବ। ରୁଷିଆ ଏବଂ ଆମେରିକା ଯେଉଁଭଳି ଭାବରେ ଆଲୋଚନା କରୁଛନ୍ତି ତାହା ୟୁରୋପ ଏବଂ ୟୁକ୍ରେନକୁ ଚିନ୍ତିତ କରିଛି। ୟୁରୋପୀୟ ଦେଶ ଏବଂ ୟୁକ୍ରେନର ଅସନ୍ତୋଷ ନାଟୋର ଭବିଷ୍ୟତ ଉପରେ ପ୍ରଭାବ ପକାଇବ ବୋଲି ଅନେକ ବିଶେଷଜ୍ଞ ମଧ୍ୟ ଆଶଙ୍କା ପ୍ରକାଶ କରିଛନ୍ତି।
