ବେଙ୍ଗାଲୁରୁର ଏକ ସ୍ବତନ୍ତ୍ର ସିବିଆଇ କୋର୍ଟ ଜୟଲଳିତାଙ୍କ ସମ୍ପତ୍ତି ସମ୍ପର୍କରେ ଏକ ଗୁରୁତ୍ବପୂ ର୍ଣ୍ଣ ରାୟ ଦେଇଛନ୍ତି । ବୁଧବାର ଦିନି ସିବିଆଇ କୋର୍ଟ ତାମିଲନାଡ଼ୁର ପୂର୍ବତନ ମୁଖ୍ୟମନ୍ତ୍ର ଦିବଂଗତ ଜେ ଜୟଲଳିତାଙ୍କ ସମସ୍ତ ଜବତ ସମ୍ପତ୍ତି ତାମିଲନାଡ଼ୁ ସରକାରଙ୍କୁ ହସ୍ତାନ୍ତର କରିବାକୁ ନିର୍ଦ୍ଦେଶ ଜାରି କରିଛନ୍ତି । ବେଙ୍ଗାଲୁରୁ କୋର୍ଟଙ୍କ ନିର୍ଦ୍ଦେଶର ଗୋଟିଏ ଦିନ ପରେ ଶୁକ୍ରବାର ଦିନ ଜବତ ସମ୍ପତ୍ତି ଗୁଡ଼ିକ ଆନୁଷ୍ଠାନିକ ଭାବରେ ରାଜ୍ୟ ସରକାରଙ୍କୁ ହସ୍ତାନ୍ତର କରାଯାଇଥିଲା । କର୍ଣ୍ଣାଟକ କର୍ତୁପକ୍ଷ ତାମିଲନାଡ଼ୁକୁ ଦେଇଥିବା ବିଳାସ ପୂର୍ଣ୍ଣ ସାମଗ୍ରୀ ମଧ୍ୟରେ ଏକ ସୁନା ଖଣ୍ଡା ଏବଂ ଏକ ସୁନା ମୁକୁଟ ଅନ୍ତର୍ଭୁକ୍ତ । ବର୍ତମାନ ସୁଦ୍ଧା କର୍ଣ୍ଣାଟକ କର୍ତ୍ତୃପକ୍ଷଙ୍କ ହାତରେ ଜୟଲଳିତାଙ୍କ ଜବତ ସମ୍ପତ୍ତିର ଏକ ବିଶାଳ ଭଣ୍ଡାର ଥିଲା। ଏଥିରେ ୨୭ କିଲୋ ୫୫୮ ଗ୍ରାମ ସୁନା ଅଳଙ୍କାର, ୧,୧୧୬ କିଲୋ ରୂପା ଏବଂ ୧,୫୨୬ ଏକର ଜମି ସହିତ ଜଡିତ କାଗଜପତ୍ର ଥିଲା। ଏହି ସମସ୍ତ ଖଜଣା କର୍ଣ୍ଣାଟକ ବିଧାନସଭାର କୋଷାଗାରରେ ସୁରକ୍ଷିତ ରଖାଯାଇଥିଲା ଏବଂ କୋର୍ଟ ଏବଂ ସରକାରୀ ଅଧିକାରୀଙ୍କ ଉପସ୍ଥିତିରେ ହସ୍ତାନ୍ତର କରାଯାଇଥିଲା।
ଆପଣଙ୍କୁ କହି ରଖୁଛୁ ଯେ ଜାନୁଆରୀ ୧୩ ତାରିଖରେ କର୍ଣ୍ଣାଟକ ହାଇକୋର୍ଟ ଜୟଲଳିତାଙ୍କ ଭଣଜା ଜେ ଦୀପକ ଏବଂ ଭଣଜା ଜେ ଦୀପାଙ୍କ ଏକ ଆବେଦନକୁ ଖାରଜ କରିଦେଇଥିଲେ, ଯେଉଁଥିରେ ସେମାନେ ଜୟଲଳିତାଙ୍କ ଆଇନଗତ ଉତ୍ତରାଧିକାରୀ ଭାବରେ ସମ୍ପତ୍ତି ଦାବି କରିଥିଲେ। ଜୟଲଳିତାଙ୍କୁ ଆୟ ବର୍ହିଭୂତ ସମ୍ପତ୍ତି ମାମଲାରେ ଦୋଷୀ ସାବ୍ୟସ୍ତ କରାଯାଇଥିଲା।
ଜୟଲଳିତାଙ୍କ ବିରୁଦ୍ଧରେ ମାମଲା ଶେଷ ହୋଇଥିଲେ ମଧ୍ୟ ତାଙ୍କ ମୃତ୍ୟୁ ପରେ ହାଇକୋର୍ଟ ୨୦୧୬ରେ ତାଙ୍କ ସମ୍ପତ୍ତି ଜବତକୁ ସମର୍ଥନ କରିଥିଲେ। ଜୟଲଳିତାଙ୍କ ବିରୋଧରେ ମାମଲା ଶେଷ ହେବା ପରେ ତାଙ୍କ ସମ୍ପତ୍ତି ଜବତ କରାଯିବା ଉଚିତ୍ ନୁହେଁ ବୋଲି ତାଙ୍କ ଉତ୍ତରାଧିକାରୀମାନେ ଯୁକ୍ତି ଦେଇଥିଲେ। ତଥାପି, ଉଚ୍ଚ ନ୍ୟାୟାଳୟ ରାୟ ଦେଇଥିଲେ ଯେ ଯେହେତୁ ସର୍ବୋଚ୍ଚ ନ୍ୟାୟାଳୟ ଅନ୍ୟ ଅଭିଯୁକ୍ତମାନଙ୍କୁ ଦୋଷୀ ସାବ୍ୟସ୍ତ କରିବା ପାଇଁ ସ୍ୱତନ୍ତ୍ର ଅଦାଲତର ରାୟକୁ ବଜାୟ ରଖିଛନ୍ତି, ତେଣୁ ସମ୍ପତ୍ତି ଜବତ ବୈଧ।
