ରିପବ୍ଲିକାନ ନେତ୍ରୀ ତୁଳସୀ ଗବାର୍ଡ଼ ବୁଧବାର ଆମେରିକାର ଜାତୀୟ ଗୁଇନ୍ଦା ନିର୍ଦ୍ଦେଶକ ଭାବେ ଶପଥ ଗ୍ରହଣ କରିଛନ୍ତି । ତାଙ୍କ ସପକ୍ଷରେ 52 ଜଣ ସିନେଟର ଭୋଟ ଦେଇଥିବା ବେଳେ 48 ଜଣ ବିପକ୍ଷରେ ଭୋଟ ଦେଇଥିଲେ । ରାଷ୍ଟ୍ରପତି ଡ଼ୋନାଲ୍ଟ ଟ୍ରମ୍ପଙ୍କ ନିଷ୍ପତ୍ତିକ୍ରମେ ନିଯୁକ୍ତି ପାଇଥିବା ଗବାର୍ଡ଼ ଏବେ ଆମେରିକାର 18 ଟି ଗୁଇନ୍ଦା ଏଜେନ୍ସିର ମୁଖ୍ୟ ଦାୟିତ୍ବରେ ରହିବେ ଏବଂ ସେମାନଙ୍କ କାର୍ଯ୍ୟରେ ତଦାରଖ ଓ ସମନ୍ବୟ କରିବେ । 2001 ସେପ୍ଟେମ୍ବର 11 ରେ ହୋଇଥିବା ଆତଙ୍କବାଦୀ ଆକ୍ରମଣରେ ପ୍ରକାଶିତ ଗୁଇନ୍ଦା ବିଫଳତାର ସମାଧାନ ପାଇଁ ଜାତୀୟ ଗୁଇନ୍ଦା ନିର୍ଦ୍ଦେଶକଙ୍କ କାର୍ଯ୍ୟାଳୟ ଗଠନ କରାଯାଇଥିଲା।
ପାରମ୍ପରିକ ଗୁଇନ୍ଦା ଅଭିଜ୍ଞତାର ଅଭାବ ଏବଂ ସରକାରୀ ବିଭାଗରେ ନେତୃତ୍ୱର ଅଭାବ କାରଣରୁ ଗବାର୍ଡଙ୍କ ନାମାଙ୍କନକୁ ନେଇ କଡ଼ା ପ୍ରଶ୍ନ ଉଠିଥିଲା।

ସମାଲୋଚକମାନେ ଏଡୱାର୍ଡ ସ୍ନୋଡେନଙ୍କ ସମେତ ‘ଆମେରିକା ବିରୋଧୀ’ ଭାବରେ ପରିଗଣିତ ବ୍ୟକ୍ତିତ୍ୱଙ୍କ ପ୍ରତି ତାଙ୍କର ଅତୀତର ସମର୍ଥନ ଏବଂ ସିରିଆ ଓ ରୁଷ୍ ପ୍ରତି ତାଙ୍କର ଅନୁକୂଳ ମନ୍ତବ୍ୟକୁ ମଧ୍ୟ ଉଲ୍ଲେଖ କରିଥିଲେ। କାର୍ଯ୍ୟକାରୀ ନିର୍ଦେଶିକା ଲୋରା ସିଆଓଙ୍କୁ ଯଦି ଗଣନାକୁ ନିଆଯାଏ, ତେବେ ଗବାର୍ଡ ହେଉଛନ୍ତି ତୃତୀୟ ମହିଳା ଯିଏ ଜାତୀୟ ଗୁଇନ୍ଦା ନିର୍ଦ୍ଦେଶକ ଭାବେ ଦାୟିତ୍ୱ ତୁଲାଇବେ। ତେବେ ସିନେଟ୍ ଦ୍ୱାରା ନିଶ୍ଚିତ ନିଯୁକ୍ତି ପାଇବାରେ ସେ ହେଉଛନ୍ତି ଦ୍ୱିତୀୟ ମହିଳା ଯିଏ କି ଆବରିଲ୍ ହେନ୍ସଙ୍କ ପରେ ଏହି ସମ୍ମାନଜନକ ପଦବୀରେ ରହିଛନ୍ତି। ଉଲ୍ଲେଖଯୋଗ୍ୟ, ୨୦୨୦ ନଭେମ୍ବର ୨୩ରେ ପୂର୍ବତନ ରାଷ୍ଟ୍ରପତି ଜୋ ବାଇଡେନଙ୍କ ଦ୍ୱାରା ମନୋନୀତ ହେନ୍ସ ୨୦୨୧ ଜାନୁଆରି ୨୦ରେ ନିଶ୍ଚିତ ହୋଇଥିଲେ, କିନ୍ତୁ ଡୋନାଲ୍ଡ ଟ୍ରମ୍ପ ଦାୟିତ୍ୱ ଗ୍ରହଣ କରିବା ପରେ ଇସ୍ତଫା ଦେଇଥିଲେ ଏବଂ ଲୋରା ସିଆଓ କାର୍ଯ୍ୟକାରୀ ନିର୍ଦ୍ଦେଶକ ଭାବେ ଦାୟିତ୍ୱ ଗ୍ରହଣ କରିଥିଲେ। ୨୦୨୪ ଆମେରିକା ରାଷ୍ଟ୍ରପତି ନିର୍ବାଚନରେ ବିଜୟୀ ହେବା ପରେ ୨୦୨୪ ନଭେମ୍ବର ୧୩ତାରିଖରେ ନବନିର୍ବାଚିତ ରାଷ୍ଟ୍ରପତି ଟ୍ରମ୍ପ ତାଙ୍କ ଆଗାମୀ କାର୍ଯ୍ୟକାଳରେ ଗବାର୍ଡଙ୍କୁ ଏହି ଭୂମିକା ପାଇଁ ମନୋନୀତ କରିବାକୁ ଇଚ୍ଛା ପ୍ରକାଶ କରିଥିଲେ।

ତୁଳସୀ ଗବାର୍ଡ ହେଉଛନ୍ତି  ଇରାକ ଯୁଦ୍ଧର ପୂର୍ବତନ ସୈନିକ। ନ୍ୟାସନାଲ ଗାର୍ଡର ଲେଫ୍ଟନାଣ୍ଟ କର୍ଣ୍ଣେଲ ଭାବରେ ଗାବାର୍ଡ ଆଫ୍ରିକା ଓ ମଧ୍ୟପ୍ରାଚ୍ୟରେ ଯୁଦ୍ଧ କ୍ଷେତ୍ରରେ ତିନିଥର ମୁତୟନ ହୋଇ କାର୍ଯ୍ୟ କରିଥିଲେ। ସେ ଜଣେ ଡେମୋକ୍ରାଟ ଥିଲେ ଯିଏ କି ଅକ୍ଟୋବର ୨୦୨୨ରେ ଦଳ ଛାଡି ସ୍ୱାଧୀନ ରାଜନେତା ହେବାକୁ ‘ଅଭିଜାତ’ (ଏଲିଟିଷ୍ଟ) ବୋଲି ଦାବି କରିଥିଲେ। ସେ ୪ ଥର କଂଗ୍ରେସଓମ୍ୟାନ୍, ୨୦୨୦ର ରାଷ୍ଟ୍ରପତି ପ୍ରାର୍ଥୀ ଏବଂ ଏନ୍‌ୱାଇଟିର ବେଷ୍ଟସେଲିଂ ଲେଖିକା ମଧ୍ୟ ଅଟନ୍ତି। ଆମେରିକୀୟ କଂଗ୍ରେସରେ ତୁଳସୀ ପ୍ରଥମ ହିନ୍ଦୁ ଥିଲେ କିନ୍ତୁ ଭାରତ ସହ ତାଙ୍କର କୌଣସି ସମ୍ପର୍କ ନାହିଁ। ଧର୍ମ କାରଣରୁ ତାଙ୍କୁ ଅନେକ ସମୟରେ ଭାରତୀୟ ବଂଶୋଦ୍ଭବ ବୋଲି ‌ମନେ କରି ଭୁଲ୍ କରାଯାଏ। ତୁଳସୀ ଆମେରିକାର ସାମୋଆ ଅଞ୍ଚଳରେ ଜନ୍ମଗ୍ରହଣ କରିଥିଲେ ଏବଂ ହାୱାଇ ଓ ଫିଲିପାଇନ୍ସରେ ଲାଳିତପାଳିତ ହୋଇଥିଲେ। ତାଙ୍କ ମା’ କ୍ୟାରୋଲ ପୋର୍ଟର ଗବାର୍ଡ ଏକ ବହୁସାଂସ୍କୃତିକ ପରିବାରରେ ବଡ଼ ହୋଇଥିଲେ ଏବଂ ହିନ୍ଦୁ ଧର୍ମ ପ୍ରତି ଆଗ୍ରହୀ ଥିଲେ। ତାଙ୍କର ସମସ୍ତ ସନ୍ତାନଙ୍କର ହିନ୍ଦୁ ନାମ ଅଛି – ଭକ୍ତି, ଜୟ, ଆର୍ଯ୍ୟନ, ତୁଳସୀ ଓ ବୃନ୍ଦାବନ।