ଗତ କିଛି ଦିନ ଧରି ମଣିପୁର ରାଜନୀତିକୁ ନେଇ ଚର୍ଚା ଜୋର ଧରିଛି । ଯାହା ଆଶା କରାଯାଉଥିଲା ତାହା ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଣିପୁରରେ ନୂଆ ମୁଖ୍ୟମନ୍ତ୍ରୀ ଅପେକ୍ଷା ରାଷ୍ଟ୍ରପତି ଶାସନ ଲାଗୁ କରିବାକୁ ପସନ୍ଦ କରିବା ପରେ ସେଠାରେ ରାଷ୍ଟ୍ରପତି ଶାସନ ଜାରି କରିଛନ୍ତି କେନ୍ଦ୍ର ସରକାର ।
ଦୁଇ ବର୍ଷ ହେଲା ମଣିପୁର ଅଶାନ୍ତ ରହିଛି । ମୁଖ୍ୟମନ୍ତ୍ରୀଙ୍କ ଇସ୍ତଫା ଦାବି କରୁଛନ୍ତି ବିରୋଧୀ । ଏହାକୁ ନେଇ ଗତ ୯ ତାରିଖରେ ଇସ୍ତଫା ଦେଇଥିଲେ ମଣିପୁର ମୁଖ୍ୟମନ୍ତ୍ରୀ ବୀରେନ ସିଂ । ତାଙ୍କ ଇସ୍ତଫା ପରେ ନୂଆ ମୁଖ୍ୟମନ୍ତ୍ରୀ କିଏ ହେବ ତାକୁ ନେଇ ଚର୍ଚା ଜୋରଧରିଥିଲା । ମଣିପୁରରେ ଲାଗୁ ହୋଇଛି ରାଷ୍ଟ୍ରପତି ଶାସନ।
ଦୁଇ ବର୍ଷ ଧରି ଅଶାନ୍ତ ରହିଥିଲା ମଣିପୁର । ମଣିପୁର ହିଂସାରେ ୨ ଶହରୁ ଅଧିକ ଜୀବନ ଯାଇଛି । ଅନେକ ଧନ ଜୀବନ ନଷ୍ଟ ହୋଇଛି । ନିଜ ଘରୁ ଯାଇ ବାହାରେ ରହିଛନ୍ତି ୬୦ ହଜାର ଲୋକ ।
ମଣିପୁରରେ ଦୀର୍ଘ ଦିନ ଧରି ରାଜନୈତିକ ଅସ୍ଥିରତା ଲାଗି ରହିଥିବାରୁ କେନ୍ଦ୍ର ସରକାର ରାଷ୍ଟ୍ରପତି ଶାସନ ଜାରି କରିବାକୁ ନିଷ୍ପତ୍ତି ନେଇଥିବା ରାଜନୀତି ସମୀକ୍ଷକମାନେ କହୁଛନ୍ତି ।
କ୍ରମାଗତ ଭାବେ ମଣିପୁରରେ ଜାତିଗତ ହିଂସା ଲାଗିରହିଛି । ରାଜ୍ୟରେ ମୈତେଇ ଓ କୁକି ସମ୍ପ୍ରଦାୟ ମଧ୍ୟରେ ଲଢ଼େଇ ଥମିବାର ନା ଧରୁନାହିଁ । ହିଂସା ନିୟନ୍ତ୍ରଣ କରିବାରେ ଅସମର୍ଥ ହୋଇପଡିଥିଲେ ବିରେନ ସରକାର । ଏପରିକି ବିଜେପି ବିଧାୟକମାନେ ବି ବିରେନ ସିଂଙ୍କ ପ୍ରତି ଅସନ୍ତୋଷ ଥିଲେ । ଗତବର୍ଷ ଅକ୍ଟୋବରରେ ମଣିପୁରର ୧୯ ଜଣ ଭାଜପା ବିଧାୟକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ଚିଠି ଲେଖି ଏନ ବୀରେନ ସିଂହଙ୍କୁ ମୁଖ୍ୟମନ୍ତ୍ରୀ ପଦରୁ ବହିଷ୍କାର କରିବାକୁ ଦାବି କରିଥିଲେ । ଯାହା ପରେ ବିଜେପି ଏକ ବଡ଼ ପଦକ୍ଷେପ ନେଇଛି । ନିଜ ଦଳରେ ଅସନ୍ତୋଷକୁ ଦେଖି ବିଜେପି ଅନ୍ୟ କାହାକୁ ମୁଖ୍ୟମନ୍ତ୍ରୀ କରିବାକୁ ଏବେ ଉଚିତ ମନେ କରିନାହିଁ । ଆଗାମୀ ଦିନରେ ଦେଖାଯିବ ମଣିପୁର ଶାନ୍ତ ଅବସ୍ଥାକୁ ଆସୁଛି କି ନାହିଁ ।
