ଜାନୁଆରୀ 16 ତାରିଖରେ ନିଜ ଘର ମଧ୍ୟରେ ଆକ୍ରମଣର ଶିକାର ହୋଇଥିବା ବଲିଉଡ଼ ଅଭିନେତା ସୈଫ ଅଲୀ ଖାନ ଗୁରୁବାର ସନ୍ଧ୍ୟାରେ ବାନ୍ଦ୍ରା ପୁଲିସ ସମ୍ମୁଖରେ ସେଦିନର ଘଟଣା ସଂପର୍କରେ ବଖାଣିଛନ୍ତି ।

ସୈଫ ଅଲ୍ଲୀ ଖାନ ପୁଲିସକୁ  କହିଛନ୍ତି ଯେ ସେ ଏବଂ ତାଙ୍କ ପତ୍ନୀ ଅଭିନେତ୍ରୀ କରୀନା କପୁର ଖାନ 11 ମହଲାରେ ସେମାନଙ୍କ ଶୟନ କକ୍ଷରେ ଥିଲେ । ସେମାନେ ହଠାତ ଘରର ସହାୟକ ଏଲିଆମା ଫିଲିପଙ୍କ ଚିତ୍କାର ଶୁଣିଲେ। ତା’ପରେ ସେମାନେ ଜେହଙ୍କ କୋଠରୀକୁ ଧାଇଁଗଲେ। ସେଠାରେ ସେମାନେ ଜଣେ ଅଜଣା ଅନୁପ୍ରବେଶକାରୀଙ୍କୁ ପାଇଲେ।

ଜେହ କାନ୍ଦୁଥିଲେ ଏବଂ ଅଭିନେତା ଜଣକ ବ୍ୟକ୍ତିଙ୍କୁ ଅଟକାଇବାକୁ ଚେଷ୍ଟା କରିବା ସମୟରେ ଗଣ୍ଡଗୋଳ ସୃଷ୍ଟି ହୋଇଥିଲା। ସଂଘର୍ଷ ସମୟରେ, ଅନୁପ୍ରବେଶକାରୀ ସୈଫ ଅଲ୍ଲୀ ଖାନଙ୍କ ପିଠି, ବେକ ଏବଂ ହାତରେ ଅନେକ ଥର ଛୁରୀରେ ଆକ୍ରମଣ କରିଚାଲିଲେ।

ତାଙ୍କର ଆଘାତ ସତ୍ତ୍ୱେ ସୈଫ୍ ଅଲ୍ଲୀ ଖାନ ଅନୁପ୍ରବେଶକାରୀଙ୍କୁ ସାମ୍ନା କରିବାରେ ସଫଳ ହୋଇଥିଲେ। ତା’ପରେ ଘରର କର୍ମଚାରୀମାନେ ଜେହଙ୍କ ସହିତ ବାହାରକୁ ଦୌଡ଼ି ପଳାଇଥିଲେ। କିଛି ସମୟ ମଧ୍ୟରେ ସମସ୍ତେ ମିଶି ଆକ୍ରମଣକାରୀଙ୍କୁ କୋଠରୀରେ ବନ୍ଦ କରି ଦେଇଥିଲେ।

ଘଟଣା ପରେ ପ୍ରାରମ୍ଭରେ ସୈଫ୍ ଅଲ୍ଲୀ ଖାନଙ୍କୁ ଲୀଳାବତୀ ହସ୍ପିଟାଲକୁ ପଠାଯାଇଥିଲା।  ଜାନୁଆରି ୨୧ ତାରିଖରେ ତାଙ୍କୁ ଡିସଚାର୍ଜ କରାଯାଇଥିଲା।