ଆଉ ଦିନ କେଇଟା ପରେ ଆସିବ ସାଧାରଣ ବଜେଟ । 2025-26 ଆର୍ଥିକ ବର୍ଷ ବଜେଟ ପ୍ରସ୍ତୁତି ସମ୍ପ୍ରତି ଚୂଡ଼ାନ୍ତ ପର୍ଯ୍ୟାୟରେ । ଚଳିତଥର ବଜେଟରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ କରଦାତାଙ୍କ ପାଇଁ ଅନେକ ଗୁରୁତ୍ବପୂଣ୍ଣ  ସଂସ୍କାର ପଦକ୍ଷେପ ଆଣିବା ଆାଶା କରାଯାଉଛି ।2025 ସାଧାରଣ ବଜେଟରେ ଆୟକର ସମ୍ପର୍କରେ ଅନେକ ବଡ଼ ଘୋଷଣା ହୋଇପାରେ । ଏଥିରେ ବିଶେଷକରି ଆୟକର ରିଟଣ୍ଣର ସ୍ଳାବରେ ପରିବର୍ତନ ହୋଇପାରେ ।

ନୂତନ ଟିକସ ବ୍ୟବସ୍ଥାକୁ ଅଧିକ ଆକର୍ଷୀଣୀୟ କରିବା ପାଇଁ ଚଳିତଥର ବଜେଟରେ ଅର୍ଥମନ୍ତ୍ରୀ ଆୟକର ସ୍ଳାବ ହାରରେ ସଂଶୋଧନ କରିପାରନ୍ତି । ବିଶେଷ ଜ୍ଞମାନେ ଦେଇଥିବା ପରାମର୍ଶ ଅନୁଯାୟୀ, ୨୦ ଲକ୍ଷ ଟଙ୍କାରୁ ଅଧିକ ଆୟ ଉପରେ ୩୦% ଟିକସ ହାର ଲାଗୁ କରାଯିବା ଉଚିତ, ଯାହା ଦ୍ଵାରା ଏହା ମୁଦ୍ରାସ୍ଫୀତି ଏବଂ ବର୍ତ୍ତମାନର ଆର୍ଥିକ ପରିସ୍ଥିତି ସହ ସମନ୍ୱିତ ରହିବ। ଏହି ପଦକ୍ଷେପ ନୂତନ ଟିକସ ବ୍ୟବସ୍ଥାକୁ ପ୍ରୋତ୍ସାହିତ କରିବା ପାଇଁ ଏକ ପ୍ରୟାସ ହୋଇପାରେ।

ବରିଷ୍ଠ ନାଗରିକଙ୍କ ପାଇଁ ସ୍ୱତନ୍ତ୍ର ରିହାତି

ନୂତନ ଟିକସ ବ୍ୟବସ୍ଥା ସମସ୍ତ କରଦାତାଙ୍କ ପାଇଁ ସମାନ ଭାବରେ ପ୍ରଯୁଜ୍ୟ। ବିଶେଷଜ୍ଞମାନେ ସୁପାରିଶ କରିଛନ୍ତି ଯେ ୬୦ ବର୍ଷ ଏବଂ ତଦୁର୍ଦ୍ଧ୍ୱ ବୟସ୍କ ବରିଷ୍ଠ ନାଗରିକଙ୍କ ପାଇଁ ପୃଥକ ସ୍ଲାବ୍‌ ସୃଷ୍ଟି କରାଯିବା ଉଚିତ। ଏଥିରେ ଅଧିକ ଛାଡ଼ ସୀମା କିମ୍ବା କମ୍‌ ଟିକସ ହାର ଅନ୍ତର୍ଭୁକ୍ତ ହୋଇପାରେ, ଯାହା ସେମାନଙ୍କର ଆର୍ଥିକ ସ୍ଥିତିକୁ ଉନ୍ନତ କରିପାରିବ।

ଷ୍ଟାଣ୍ଡାର୍ଡ ଡିଡକ୍ସନ ବୃଦ୍ଧି କରିବାକୁ ଦାବି

ପୁରୁଣା ଆୟକର ବ୍ୟବସ୍ଥାରେ ଷ୍ଟାଣ୍ଡାର୍ଡ ଡିଡକ୍ସନ ୫୦,୦୦୦ ଟଙ୍କା ଏବଂ ନୂତନ ବ୍ୟବସ୍ଥାରେ ଏହା ୭୫,୦୦୦ ଟଙ୍କା। ବିଶେଷଜ୍ଞମାନେ ଏହାକୁ ୧ ଲକ୍ଷ ଟଙ୍କାକୁ ବୃଦ୍ଧି କରିବାକୁ ପରାମର୍ଶ ଦେଇଛନ୍ତି। ଏହି ପରିବର୍ତ୍ତନ ଦରମା ଭିତ୍ତିକ କର୍ମଚାରୀମାନଙ୍କୁ ଆଶ୍ୱସ୍ତି ପ୍ରଦାନ କରିବ।

ସୁନା ଉପରେ ଆମଦାନୀ ଶୁଳ୍କରେ ପରିବର୍ତ୍ତନ

ନିଅଣ୍ଟକୁ ନିୟନ୍ତ୍ରଣ କରିବା ପାଇଁ ସରକାର ସୁନା ଉପରେ ଆମଦାନୀ ଶୁଳ୍କ ବୃଦ୍ଧି କରିପାରନ୍ତି। ସମ୍ପ୍ରତି ଆମଦାନୀ ଶୁଳ୍କ ୧୫% ରୁ ୬%କୁ ହ୍ରାସ କରାଯାଇଛି। ତଥାପି, ଏଥର ଶୁଳ୍କ ବୃଦ୍ଧି ହେବାର ସମ୍ଭାବନା ଅଛି, ଯାହା ବାଣିଜ୍ୟ ନିଅଣ୍ଟ ହ୍ରାସ କରିବାରେ ସାହାଯ୍ୟ କରିବ।

ଧାରା ୮୦ସିରେ ଆୟକର ରିଆତି ସୀମାରେ ବୃଦ୍ଧି

ଧାରା ୮୦ସି ଅନୁଯାୟୀ ଆୟକର ରିଆତି ସୀମା ୧.୫ ଲକ୍ଷରୁ ୩.୫ ଲକ୍ଷ ଟଙ୍କାକୁ ବୃଦ୍ଧି କରିବାକୁ ପରାମର୍ଶ ଦିଆଯାଇଛି। ଏହାବ୍ୟତୀତ, ଗୃହ ଋଣ ସୁଧ କାଟ୍‌କୁ ଏହି ଧାରାରୁ ପୃଥକ କରି ଏଥିରେ ଅଧିକ ସୀମା ପ୍ରଦାନ କରିବାକୁ ଦାବି ହୋଇଛି।