ନୂଆ ବର୍ଷରେ ଦିଲ୍ଲୀ ବିଧାନସଭା ନିର୍ବାଚନରେ ତାରିଖ ଘୋଷଣା ହେବାକୁ ଯାଉଛି । ନିର୍ବାଚନ ପାଖେଇ ଆସୁଥିବାରୁ ଆମ ଆଦମୀ ପାର୍ଟି ବିଜେପି ଉପରେ କଡ଼ା ଆକ୍ରମଣ କରୁଥିବା ଦେଖିବାକୁ ମିଳିଛି । ଏହା ସହିତ ଦଳ ଦିଲ୍ଲୀର ସମସ୍ତ 70 ଟି ଆସନ ପାଇଁ ପ୍ରାର୍ଥୀଙ୍କ ନାମ ଚୂଡ଼ାନ୍ତ କରିଛି । ନିର୍ବାଚନ ତାତି ମଧ୍ୟରେ ଦିଲ୍ଲୀର ଲେଫ୍ଟନାଣ୍ଟ ଗଭର୍ଣ୍ଣର ଆପ ସରକାରଙ୍କ ମହିଳା ସମ୍ମାନ ଯୋଜନାକୁ ନେଇ ତଦନ୍ତ ନିର୍ଦ୍ଦେଶ ଦେଇଛନ୍ତି ଏହା ପରେ ଅରବିନ୍ଦ କେଜ୍ରିଓ୍ବାଲ ବିଜେପିକୁ କାଡ଼ା ଟାର୍ଗେଟ କରିଛନ୍ତି । ଆସନ୍ତା ବର୍ଷ ଫେବୃଆରୀରେ ଦିଲ୍ଲୀରେ ବିଧାନସଭା ନିର୍ବାଚନ ହେବାର ସମ୍ଭାବନା ରହିଛି ।
ମହିଳା ସମ୍ମାନ ଏବଂ ସଞ୍ଜୀବନୀ ଯୋଜନାକୁ ନେଇ ବିଜେପି ଡରିଯାଇଛି ବୋଲି ଅରବିନ୍ଦ କେଜ୍ରିୱାଲ ଅଭିଯୋଗ କରିଛନ୍ତି। ଏହି ସମୟରେ ସେ କହିଛନ୍ତି ଯେ ଦିଲ୍ଲୀରେ ବିଜେପି ୩-୪ଟି ଆସନ ବି ପାଇବ ନାହିଁ। ବିଜେପି ମହିଳା ସମ୍ମାନ ଯୋଜନାକୁ ନେଇ ଆମ୍ ଆଦମୀ ପାର୍ଟି ଏବଂ କେଜ୍ରିୱାଲ ଠକିଥିବାର ଅଭିଯୋଗ କରିଛି। ଏ ସମ୍ପର୍କରେ ଦିଲ୍ଲୀ ବିଜେପିର ମହିଳା ମୋର୍ଚ୍ଚାର ନେତାମାନେ ଗୁରୁବାର ଦିନ ଆପ ସୁପ୍ରିମୋ ଅରବିନ୍ଦ କେଜ୍ରିୱାଲଙ୍କ ବାସଭବନ ନିକଟରେ ପ୍ରଦର୍ଶନ କରିଥିଲେ।
ଦିଲ୍ଲୀ ସରକାର ୨୦୨୪-୨୫ ବଜେଟରେ ମାସିକ ୧୦୦୦ ଟଙ୍କା ପ୍ରଦାନ କରିବାକୁ ମୁଖ୍ୟମନ୍ତ୍ରୀ ମହିଳା ସମ୍ମାନ ଯୋଜନା ଘୋଷଣା କରିଥିଲେ। କେଜ୍ରିୱାଲ କହିଥିଲେ ଯେ ଯଦି ଦିଲ୍ଲୀରେ ଆପ କ୍ଷମତାରେ ରହେ ତେବେ ଏହି ପରିମାଣକୁ ୨୧୦୦ ଟଙ୍କାକୁ ବୃଦ୍ଧି କରାଯିବ। ୨୦୨୦ ମସିହାରେ ଦିଲ୍ଲୀରେ ଅନୁଷ୍ଠିତ ବିଧାନସଭା ନିର୍ବାଚନରେ ଆମ୍ ଆଦମୀ ପାର୍ଟି ଜବରଦସ୍ତ ପ୍ରଦର୍ଶନ କରିଥିଲା। ଏପରିକି ଏହି ନିର୍ବାଚନରେ ଆମ୍ ଆଦମୀ ପାର୍ଟି ୬୨ଟି ଆସନ ଜିତିଥିଲା। ଯେଉଁଠାରେ ବିଜେପି ମାତ୍ର ୮ଟି ଆସନ ପାଇଥିଲା।
