ଦାୟିତ୍ବ ଗ୍ରହଣ କରିବାର ମାତ୍ର 13 ମାସରୁ କମ ସମୟ ମଧ୍ୟରେ ରଘୁବର ଦାସଙ୍କୁ ଓଡ଼ିଶା ରାଜ୍ୟପାଳ ପଦରୁ ଯେପରି ବିଦା କରାଗଲା ତାହା କେବଳ ଓଡ଼ିଶା କି ଝାଡ଼ଖଣ୍ଡ ନୁହେଁ ଜାତୀୟ ରାଜନୀତିରେ ମଧ୍ୟ ଆଲୋଡ଼ନ ସୃଷ୍ଟି କରିଛି । 2023 ଅକ୍ଟୋବର 31 ତାରିଖରେ ରାଜ୍ୟପାଳ ଭାବେ ଦାୟିତ୍ବ ଗ୍ରହଣ କରିବା ଦିନଠାରୁ ସେ ବିବାଦରେ ଥିଲେ । ଓଡ଼ିଶାରେ ଜଣେ ସରକାରୀ କର୍ମଚାରୀ ଙ୍କୁ ତାଙ୍କ ପୁଆ ମାଡ଼ ମାରିବା ଘଟଣାରୁ ଆରମ୍ଭ କରି ସରକାରୀ କାର୍ଯ୍ୟରେ ଅଯଥାରେ ହସ୍ତକ୍ଷେପ ଏବଂ ଝାଡ଼ଖଣ୍ଡ ନିର୍ବାଚନରେ ବିଜେପିର ପରାଜୟରେ ତାଙ୍କର ଭୂମିକା ରଘୁବରଙ୍କୁ ଘୋର ଅଡ଼ୁଆ ପରିସ୍ଥିତିରେ ପକାଇଦେଇଥିଲା ।
ରାଜ୍ୟପାଳ ଭାବେ ଦାୟିତ୍ବ ଗ୍ରହଣ କରିବା ପରେ ପରେ ରଘୁବର ରାଜ୍ୟର ବିଭିନ୍ନ ଜିଲ୍ଲାଗସ୍ତ ଆରମ୍ଭ କରିଥିଲେ । କିନ୍ତୁ ବିବାଦ ହୋଇଥିଲା ଯେତେବେଳେ ସେ ପ୍ରଶାସନରେ ହସ୍ତକ୍ଷେପ ଆରମ୍ଭ କରିଥିଲେ । ସେ ଜଣେ ରାଜ୍ୟପାଳ କମ ବରଂ ଜଣେ ରାଜନୈତିକ କର୍ମୀଙ୍କ ଭଳି ଆଚରଣ ପ୍ରଦର୍ଶନ କରୁଥିବା ଅଭିଯୋଗ ହୋଇଥିଲା । ଓଡ଼ିଶାରେ ନିର୍ବାଚନ ବେଳେ ରାଜଭବନରେ ରହି ସେ ଦଳୀୟ ନେତା ଭଳି ଆଚରଣ ପ୍ରଦର୍ଶନ କରୁଥିଲେ । ରାଜ୍ୟରେ ବିଜେଡ଼ି ସରକାରକୁ ହଇରାଣ କରିବା ଲାଗି ଚକ୍ରାନ୍ତ ଚଳାଇଥିଲେ । ଏସଂପର୍କରେ ତାଙ୍କ ବିରୋଧରେ ଅଭିଯୋଗ ହୋଇଥିଲା ।
ତେବେ ରଥଯାତ୍ରା ସମୟରେ ପୁରୀ ରାଜଭବନରେ ରାଜ୍ୟପାଳ ଶ୍ରୀ ଦାସଙ୍କ ପୁଅ ଜଣେ କର୍ତ୍ତବ୍ୟରତ ସରକାରୀ ଅଧିକାରୀଙ୍କୁ ମାଡ଼ ମାରିବା ଏବଂ ଅପମାନିତ କରିବା ଘଟଣା ସବୁଠାରୁ ବଡ଼ ବିବାଦ ସୃଷ୍ଟି କରିଥିଲା। ଏହାକୁ ନେଇ ରାଜ୍ୟ ରାଜନୀତି ଉଠିଥିଲା ପଡ଼ିଥିଲା। ଏହି ଘଟଣାକୁ ନେଇ ଉଭୟ ବିଜେଡି ଓ କଂଗ୍ରେସ୍ ଶ୍ରୀ ଦାସଙ୍କ ଇସ୍ତଫା ଦାବି କରିଥିଲେ। ତାଙ୍କ ଇସ୍ତଫା ଏବଂ ପୁଅ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବିରେ ବିରୋଧୀ ବିଧାନସଭାକୁ ଅଚଳ କରି ଦେଇଥିଲେ। ରାଜରାସ୍ତାରେ ମଧ୍ୟ ବିଭିନ୍ନ ସଂଗଠନ ପକ୍ଷରୁ ବିକ୍ଷୋଭ, ନାରାବାଜି ହୋଇଥିଲା। ଏପରିକି ଝାଡ଼ଖଣ୍ଡ ନିର୍ବାଚନରେ ଏହା ଏକ ପ୍ରମୁଖ ପ୍ରସଙ୍ଗ ପାଲଟିଥିଲା। ତାଙ୍କ ପୁଅ ବିରୋଧରେ କାର୍ଯ୍ୟାନୁଷ୍ଠାନ ନନେବା ଲାଗି ସେ ରାଜ୍ୟ ସରକାରଙ୍କ ଉପରେ ପ୍ରବଳ ଚାପ ପକାଇଥିଲେ। ଓଡ଼ିଆ ଅସ୍ମିତା କଥା କହୁଥିବା ରାଜ୍ୟରେ ବିଜେପି ସରକାରଙ୍କୁ ଏହା ଅଡ଼ୁଆରେ ପକାଇଥିଲା। ଝାଡ଼ଖଣ୍ଡ ବିଧାନସଭା ନିର୍ବାଚନ ବେେଳ ମଧ୍ୟ ସେ ବିବାଦୀୟ ହୋଇପଡ଼ିଥିଲେ। ଓଡ଼ିଶା ରାଜଭବନକୁ ସେ ବିଜେପିର କଣ୍ଟ୍ରୋଲ ରୁମ୍ ଭଳି ବ୍ୟବହାର କରିଥିଲେ। ରାଜଭବନରେ ରହି ଝାଡ଼ଖଣ୍ଡ ନିର୍ବାଚନ ପରିଚାଳନା କରୁଥିଲେ। ରାଜ୍ୟପାଳ ପଦ ଛାଡ଼ି ଝାଡ଼ଖଣ୍ଡ ରାଜନୀତିକୁ ଫେରିବା ଲାଗି ସେ ଜିଦ୍ ଧରିବାରୁ ବିଜେପି ହାଇକମାଣ୍ଡ ଅଡ଼ୁଆ ପରିସ୍ଥିିତିରେ ପଡ଼ିଯାଇଥିଲେ। ତାଙ୍କୁ ବୁଝାଇବା ଲାଗି ବିଜେପି ନେତାମାନଙ୍କୁ ଢେର କସରତ କରିବାକୁ ପଡ଼ିଥିଲା। ନିର୍ବାଚନରେ ତାଙ୍କର ବୋହୂଙ୍କୁ ବିଜେପି ପ୍ରାର୍ଥୀ କରିଥିଲେ ମଧ୍ୟ ରଘୁବର କୁଆଡ଼େ ସନ୍ତୁଷ୍ଟ ନଥିଲେ।
ଅନ୍ୟପକ୍ଷରେ ରାଜ୍ୟରେ ବିଜେପିକୁ ହରାଇବା ଲାଗି ସେ ନିଜ ଲୋକଙ୍କୁ ଲଗାଇ ଭିତିରି ଷଡ଼ଯନ୍ତ୍ର ଚଳାଇଥିଲେ। ଏହି ଖବର ଦଳୀୟ ହାଇକମାଣ୍ଡଙ୍କ ନିକଟରେ ପହଞ୍ଚିଥିଲା। ଆଭ୍ୟନ୍ତରୀଣ ଯାଞ୍ଚ ରିପୋର୍ଟ ମିଳିବା ପରେ ହାଇକମାଣ୍ଡ କ୍ଷୁବ୍ଧ ହୋଇ ତାଙ୍କୁ ବିଦା କରିଥିବା କୁହାଯାଉଛି। କେବଳ ବିଜେଡି କି କଂଗ୍ରେସ ନୁହେଁ, ବିଜେପି ନେତାମାନେ ମଧ୍ୟ ତାଙ୍କ ବିରୋଧରେ ଅଭିଯୋଗ କରିଥିଲେ। ସେ ବିଶ୍ୱବିଦ୍ୟାଳୟ ଆଇନ୍ର ସଂଶୋଧନ ବିଲ୍କୁ ଦସ୍ତଖତ ନ କରି ଫେରାଦେଇଥିଲେ। ବିଜେପି ସରକାରକୁ ଏହା ଅଡ଼ୁଆରେ ପକାଇ ଦେଇଥିଲା। ଏସବୁ ଘଟଣାରେ ତାଙ୍କର ଅଯଥା ହସ୍ତକ୍ଷେପକୁ ନେଇ ରାଜ୍ୟ ବିଜେପି ନେତା ହାଇକମାଣ୍ଡଙ୍କ ନିକଟରେ ଫେରାଦ ହୋଇଥିଲେ।
