ଜୟପୁର-ଆଜମେର ଜାତୀୟ ରାଜପଥ ନିକଟରେ ବଡ଼ ଅଘଟଣ ଘଟି ଚାଲିଯାଇଛି 11 ଜଣଙ୍କ ଜୀବନ । ପେଟ୍ରୋଲ ପମ୍ପ ସାମ୍ନାରେ ଘଟିଥିବା ଭୟଙ୍କର ଦୁର୍ଘଟଣାରେ ମୃତ୍ୟୁସଂଖ୍ୟା ବୃଦ୍ଧି ପାଇଛି। ଭାନ୍କ୍ରୋଟାସ୍ଥିତ ଏକ ପେଟ୍ରୋଲ ପମ୍ପ ନିକଟରେ ଆଜି ଭୋରରୁ ଗୋଟିଏ ଏଲପିଜି ବୋଝେଇ ଟ୍ରକ୍ ଓ ଅନ୍ୟ ଗୋଟିଏ ସିଏନଜି ବୋଝେଇ ଟ୍ରକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ଏହା ପରେ ସେହି ରାସ୍ତା ଦେଇ ଯାଉଥିବା ଅନ୍ୟାନ୍ୟ ଗାଡ଼ିରେ ନିଆଁ ଲାଗି ଯାଇଥିଲା । ଗୁରୁତର ଲୋକମାନଙ୍କୁ ମେଡିକାଲରେ ଭର୍ତ୍ତି କରାଯାଇଛି । ମୃତ୍ୟୁ ସଂଖ୍ୟା ବଢ଼ିବ ବୋଲି କୁହାଯାଉଛି ।
ପ୍ରଥମେ ଟ୍ୟାଙ୍କରରୁ ଗ୍ୟାସ୍ ଲିକ୍ ହୋଇଥଲା। ପରେ ହୋଇଥିଲା ପ୍ରଚଣ୍ଡ ବିସ୍ଫୋରଣ। ଫଳରେ ପୂରା ଅଞ୍ଚଳରେ ଅଗ୍ନିକାଣ୍ଡ ଘଟିଥିଲା। ଏଥିରେ ୪୦ରୁ ଅଧିକ ଗାଡ଼ି ମଧ୍ୟ ଜଳି ଯାଇଛି।
ସିଏନଜି ଗାଡି ଏବଂ ପେଟ୍ରୋଲ ଗାଡି ମୁହାଁମୁହିଁ ଧକ୍କା ହେବାର କିଛି ସମୟ ପରେ ବିସ୍ଫୋରଣ ହୋଇଥିଲା। ଏହାପରେ ନିଆଁ ନିକଟସ୍ଥ ଅଞ୍ଚଳକୁ ବ୍ୟାପିଥିଲା ।
ଜାତୀୟ ରାଜପଥ ନିକଟରେ ଥିବା ଗୋଟିଏ ଘରକୁ ନିଆଁ ବ୍ୟାପିବା ସହ ଏହାକୁ ପାଉଁଶ କରି ଦେଉଛି। ପୂରା ଘରକୁ ନିଆଁ ଧ୍ୱଂସ କରିଦେଇଛି। ଆଉ କିଛି ଭିଡିଓରେ ଦେଖାଯାଉଛି ଯେ ବିସ୍ଫୋରଣ ଓ ଅଗ୍ନିକାଣ୍ଡ ପରେ ପୂରା ଅଞ୍ଚଳର ଧୂଆଁମୟ ହୋଇଯାଉଛି।
