ରାହୁଲ ଗାନ୍ଧୀ ବିଜେପି ସାଂସଦ ପ୍ରତାପ ଚନ୍ଦ୍ର ଷଡ଼ଙ୍ଗୀ ଓ ମୁକେଶ ରାଜପୁତଙ୍କୁ ଧକ୍କା ଦେଇ ଆହତ କରିବା ଏବଂ ଜଣେ ଅନୁସୂଚିତ ଜନଜାତିର ମହିଳା ସାଂସଦଙ୍କୁ ଅସହଜ ପରିସ୍ଥିତିର ଅନୁଭବ କରିବାକୁ ଦେବା ପରେ ରାଜନୀତି ଜୋର୍ ଧରିଛି। ଏହା ଉପରେ ପ୍ରତିକ୍ରିୟା ପ୍ରକାଶ କରି ବିଜେପି କହିଛି, ସଭ୍ୟ ସମାଜରେ ରାହୁଲ ଗାନ୍ଧୀଙ୍କ ଆଚରଣ ଅକଳ୍ପନୀୟ। ସେ ବିରୋଧୀ ଦଳ ନେତା ପଦରେ ରହିବା ପାଇଁ ଅଯୋଗ୍ୟ। ତେବେ ଲୋକସଭାରେ ବିରୋଧୀ ଦଳ ନେତା ଏହି ଅଭିଯୋଗକୁ ଖଣ୍ଡନ କରି କହିଛନ୍ତି ଯେ ବିଜେପି ସାଂସଦମାନେ ହିଁ ତାଙ୍କୁ ବାଧା ଦେଇ ଧକ୍କା ଦେଇଥିଲେ।
ବିଜେପି କହିଛି ରାହୁଲ ଗାନ୍ଧୀ ଏବଂ ମଲ୍ଲିକାର୍ଜୁନ ଖଡ଼ଗେଙ୍କ ବୟାନ ସେମାନଙ୍କ ଅହଂକାରକୁ ଦର୍ଶାଉଛି। କେନ୍ଦ୍ରମନ୍ତ୍ରୀ ଶିବରାଜ ଚୌହାନ ବିଜେପିର ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ରାହୁଲ ଗାନ୍ଧୀ ‘ଗୁଣ୍ଡାଗିରି’ କରିଥିଲେ ଏବଂ ଉଦ୍ଦେଶ୍ୟମୂଳକ ଭାବରେ ବିଜେପି ସାଂସଦଙ୍କ ସହ ଧସ୍ତାଧସ୍ତି କରିଥିଲେ। କଂଗ୍ରେସ ଓ ଅନ୍ୟ ସାଂସଦମାନେ ପ୍ରାୟ ପ୍ରତିଦିନ ମକର ଦ୍ୱାରରେ ବିକ୍ଷୋଭ ପ୍ରଦର୍ଶନ କରୁଛନ୍ତି ଏବଂ ଆମେ ମଧ୍ୟ ସେମାନଙ୍କୁ ବିଚଳିତ ନ କରି ସଂସଦ ଭିତରକୁ ପ୍ରବେଶ କରୁଛୁ। ତେବେ ରାହୁଲ ଗାନ୍ଧୀ ଉଦ୍ଦେଶ୍ୟମୂଳକ ଭାବେ ବିଜେପି ସାଂସଦଙ୍କ ସହ ଧସ୍ତାଧସ୍ତି କରି ହିଂସାକାଣ୍ଡ ଘଟାଇଥିଲେ ବୋଲି ଶିବରାଜ ଚୌହାନ କହିଛନ୍ତି। ସଂସଦରେ ଯୁକ୍ତି ବଦଳରେ ଶକ୍ତି ବ୍ୟବହାର କରାଯିବ କି ବୋଲି ଚୌହାନ ପ୍ରଶ୍ନ କରିଛନ୍ତି। ଆମର ଆଦିବାସୀ ସାଂସଦ ଫାଙ୍ଗନନ କୋନୟାକ ଯାହା ବି କହିଛନ୍ତି, ସେଥିରେ ଆମେ ଦୁଃଖରେ ଭରି ଯାଇଛୁ। ଏନେଇ ସେ ରାଜ୍ୟସଭା ବାଚସ୍ପତିଙ୍କ ନିକଟରେ ଅଭିଯୋଗ କରିଛନ୍ତି। ଭାରତୀୟ ସମାଜରେ ଏହା ଗ୍ରହଣୀୟ ନୁହେଁ। ଜଣେ ଆଦିବାସୀ ମହିଳା କେବେ ମିଛ କହିବେ ନାହିଁ। ରାହୁଲ ଗାନ୍ଧୀ ଯାହା କରିଛନ୍ତି ତାହା ଅଣଭାରତୀୟ ବୋଲି ଶିବରାଜ ଚୌହାନ କହିଛନ୍ତି। ମୁଁ ତାଙ୍କ ଆଚରଣ ଦେଖୁଛି। କିନ୍ତୁ ଆଜି ରାହୁଲ ଯାହା କରିଛନ୍ତି ତାହା ଏକ ସଭ୍ୟ ସମାଜ ଦ୍ୱାରା ଅକଳ୍ପନୀୟ। ବିରୋଧୀ ଦଳ ନେତା ପଦ ପାଇଁ ସେ ଯୋଗ୍ୟ ନୁହନ୍ତି ବୋଲି ଚୌହାନ କହିଛନ୍ତି। ସଂସଦରେ ଯୁକ୍ତି ବଦଳରେ ଶକ୍ତି ବ୍ୟବହାର କରାଯିବ କି ବୋଲି ଚୌହାନ ପ୍ରଶ୍ନ କରିଛନ୍ତି।
ତେଣେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଲୋକସଭା ବାଚସ୍ପତିଙ୍କୁ ଚିଠି ଲେଖି ଦାବି କରିଛନ୍ତି ଯେ ତାଙ୍କୁ ବିଜେପି ସାଂସଦମାନେ ଧକ୍କା ଦେବାରୁ ଆଣ୍ଠୁରେ ଆଘାତ ଲାଗିଛି। ବିଜେପି ସାଂସଦମାନେ ଖଡ଼ଗେ ଓ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସଂସଦ ପ୍ରବେଶକୁ ଅବରୋଧ କରୁଥିବାର ଏକ ଭିଡିଓ ମଧ୍ୟ କଂଗ୍ରେସ ସେୟାର କରିଛି। ସେପଟେ ଡ. ଆମ୍ବେଦକରଙ୍କ ପ୍ରତି ବିବାଦୀୟ ମନ୍ତବ୍ୟକୁ ନେଇ କଂଗ୍ରେସ ଗୃହମନ୍ତ୍ରୀ ଅମିତ ଶାହଙ୍କ ଇସ୍ତଫା ଦାବିକୁ ଜୋରଦାର କରିଛି। ରାହୁଲ ଗାନ୍ଧୀଙ୍କ ସମେତ କଂଗ୍ରେସ ସାଂସଦମାନେ ଆମ୍ବେଦକରଙ୍କୁ ସମର୍ଥନ ଜଣାଇ ନୀଳ ରଙ୍ଗର ପୋଷାକ ପିନ୍ଧିଥିବା ବେଳେ ବିଜେପି ନେତାମାନେ କଂଗ୍ରେସ ଗଣତନ୍ତ୍ରକୁ ହତ୍ୟା କରିବା ସହ ରାଜନୈତିକ ଫାଇଦା ପାଇଁ ଆମ୍ବେଦକରଙ୍କ ପରମ୍ପରାକୁ ଅପବ୍ୟବହାର କରୁଥିବା ଅଭିଯୋଗ କରିଛନ୍ତି।
କଂଗ୍ରେସ ନେତା ରାହୁଲ ଗାନ୍ଧୀ ଦାବି କରିଛନ୍ତି ଯେ ବିଜେପିର ମୂଳ ରଣନୀତି ହେଉଛି ଶିଳ୍ପପତି ଗୌତମ ଆଦାନୀଙ୍କ ଉପରେ ଆଲୋଚନାକୁ ଏଡ଼ାଇବା। ସଂସଦ ଅଧିବେଶନର କିଛି ଦିନ ପୂର୍ବରୁ ଆମେରିକାରେ ଆଦାନୀ ମାମଲା ଉଠିଥିଲା ଏବଂ ବିଜେପି ଏହା ଉପରେ ଆଲୋଚନାକୁ ଏଡ଼ାଇବାକୁ ଚେଷ୍ଟା କରିଥିଲା। ଏହାପରେ ଅମିତ ଶାହଙ୍କ ବୟାନ ଆସିଥିଲା ଏବଂ ଆମେ ଆରମ୍ଭରୁ କହି ଆସୁଛୁ ଯେ ବିଜେପି ଓ ଆର୍ଏସ୍ଏସ୍ର ଚିନ୍ତାଧାରା ସମ୍ବିଧାନବିରୋଧୀ, ଆମ୍ବେଦକରବିରୋଧୀ। ରାହୁଲ କହିଛନ୍ତି, ସେମାନେ (ବିଜେପି) ଆମ୍ବେଦକରଙ୍କ ସ୍ମୃତି ଓ ଅବଦାନକୁ ଲୋପ କରିବାକୁ ଚାହୁଛନ୍ତି। ଆମେ କହିଥିଲୁ ଗୃହମନ୍ତ୍ରୀ କ୍ଷମା ମାଗିବା ଓ ଇସ୍ତଫା ଦେବା ଉଚିତ। ଆଜି ପୁଣି ସେମାନେ ଏକ ନୂଆ ବିଭ୍ରାଟ ଆରମ୍ଭ କରିଛନ୍ତି। ଆମ୍ବେଦକରଙ୍କ ପ୍ରତିମୂର୍ତ୍ତିରୁ ଆମେ ଶାନ୍ତିପୂର୍ଣ୍ଣ ଭାବେ ସଂସଦ ଭବନ ଯାଉଥିଲୁ। ବିଜେପି ସାଂସଦମାନେ ଆମକୁ ଭିତରକୁ ଯିବାକୁ ଦେଇ ନ ଥିଲେ।
