ବିସ୍ଫୋରଣରେ ଥରିଲା ପାକିସ୍ତାନ । ବଲୋଚିସ୍ତାନର କ୍ବୋଟା ରେଳ ଷ୍ଟେସନରେ ବୋମା ବିସ୍ଫୋରଣ ଯୋଗୁଁ 22 ଜଣଙ୍କ ମୃତ୍ୟୁ ହୋଇଛି । 30 ରୁ ଅଧିକ ଆହତ ହୋଇଥିବା ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି । ପ୍ରତିଦିନ ଭଳି ଷ୍ଟେସନରେ ଭିଡ଼ ଦେଖିବାକୁ ମିଳିଥିଲା । ଲୋକେ ଯାତ୍ରା କରିବା ପାଇଁ ଟିକେଟ କାଉଣ୍ଟରରେ ଭିଡ଼ ଜମାଇଥିଲେ । ଏହି ସମୟରେ ଷ୍ଟସେନରେ ଟିକେଟ ବୁକିଂ କାଉଣ୍ଟରରେ ବିସ୍ଫୋରଣ ହୋଇଥିବା ଜଣାପଡ଼ିଛି ।
ଟ୍ରେନ ପ୍ଲାଟଫର୍ମରେ ପହଞ୍ଚିବାର ଠିକ ପୁର୍ବରୁ ବିସ୍ଫୋରଣ ଯୋଗୁଁ ଏତେ ଲୋକଙ୍କ ଜୀବନ ଯାଇଛି । ମୃତକଙ୍କ ମଧ୍ୟରେ ଅନେକ ମହିଳା ଓ ଶିଶୁ ଥିବା ଜଣାପଡ଼ିଛି । ଆହତଙ୍କୁ ନିକଟସ୍ଥ ଡ଼ାକ୍ତରଖାନାରେ ଭର୍ତି କରାଯିବା ସହ ଉଦ୍ଧାର କାର୍ଯ୍ୟ ଜାରି ରହିଛି । ପୋଲିସ ଓ ସୁରକ୍ଷାକର୍ମୀ ଘଟଣାସ୍ଥଳରେ ପହଞ୍ଚି ଲୋକଙ୍କୁ ଉଦ୍ଧାର କରୁଛନ୍ତି । ଅନେକ ଲୋକଙ୍କ ଅବସ୍ଥା ଗୁରୁତର ଥିବାରୁ ମୃତ୍ୟୁ ସଂଖ୍ୟା ବଢିବା ନେଇ ମଧ୍ୟ ଆଶଙ୍କା ବଢିଛି । ମିଳିଥିବା ସୂଚନା ଅନୁସାରେ ସକାଳ 9 ଟାରେ କ୍ବେଟା ରେଳ ଷ୍ଟେସନରୁ ଜାଫର ଏକ୍ସପ୍ରେସ ଛାଡ଼ିବାର ଥିଲା । କିନ୍ତୁ ଟ୍ରେନ ପହଞ୍ଚିବା ପୂର୍ବରୁ ହିଁ ଏହି ବିସ୍ଫୋରଣ ହୋଇଛି । ବିସ୍ଫୋରଣ ପାଇଁ ବଲୋଚିସ୍ତାନ ଲିବରେସନ ଆର୍ମୀ ନିଜକୁ ଦାୟୀ କରିଥିବା ଜଣାପଡ଼ିଛି ।
