ନସ୍ରଲ୍ଲାଙ୍କ ମୃତ୍ୟୁ ପରେ ହେଜବୁଲ୍ଲା ପୁଣି ଯୁଦ୍ଧ କରିବ । ଏଥିପାଇଁ ନୂଆ ମୁଖ୍ୟ ଘୋଷଣା କରିଛି ଆତଙ୍କବାଦୀ ସଂଗଠନ । ନୈମ କ୍ୱାସୀମ ବେଶ ସକ୍ରିୟ ହୋଇ ଏବେ କାର୍ଯ୍ୟ କରୁଥିବାରୁ ତାକୁ ମୁଖ୍ୟ କରାଯାଇଛି । ସେ ନିଜର ସମର୍ଥକମାନଙ୍କୁ ବେରୁଟରେ ଗୋଟିଏ ଥର ଓ ଇରାନର ରାଜଧାନୀ ତେହରାନ ଠାରେ ଦୁଇ ଥର ସମ୍ବୋଧନ କରିଥିବା ଜଣାପଡିଛି ।
ନସ୍ରଲ୍ଲାଙ୍କ ମୃତ୍ୟୁ ପରେ ହାଶୀମ ସୈଫିଦ୍ଦିନ ହେଜବୁଲ୍ଲାର ମୁଖ୍ୟ ହେବେ ବୋଲି କୁହାଯାଉଥିଲା। କିନ୍ତୁ ଇସ୍ରାଏଲ ବେରୁଟରେ ଏୟାର ଷ୍ଟ୍ରାଇକ କରି ହାଶୀମଙ୍କୁ ମଧ୍ୟ ହତ୍ୟା କରିଥିଲା। ଏହାପରେ ଜୀବନ ବଞ୍ଚାଇବା ପାଇଁ କ୍ୱାସୀମ ଇରାନ ଚାଲି ଯାଇଥିବା କୁହାଯାଇଥିଲା।
୧୯୯୧ ମସିହାରେ କ୍ୱାସୀମଙ୍କୁ ହେଜବୁଲ୍ଲାର ତତ୍କାଳୀନ ମହାସଚିବ ଆବାସ ଅଲ ମୁସାୱି ଉପ ମୁଖ୍ୟ ଭାବେ ନିଯୁକ୍ତି ଦେଇଥିଲେ। ଏହି ସମୟସୀମା ମଧ୍ୟରେ ସଂଗଠନରେ ସେ ତାଙ୍କର ପ୍ରଭାବ ବିସ୍ତାର କରିବାକୁ ସକ୍ଷମ ହୋଇଛନ୍ତି।
ହେଜବୁଲ୍ଲା ଗଠନ ପାଇଁ ଇରାନର ରେଭ୍ୟୁଲେସନାରୀ ଗାର୍ଡସ ପ୍ରଥମେ କରିଥିବା ବୈଠକରେ ମଧ୍ୟ କ୍ୱାସୀମ ସାମିଲ ହୋଇଥିଲା। ୧୯୮୨ରେ ଇସ୍ରାଏଲର ଅନୁପ୍ରବେଶ ପରେ ହେଜବୁଲ୍ଲା ଗଠନ ହୋଇଥିଲା।
ଇରାନ ସମର୍ଥିତ ସଂଗଠନ ହେଜବୁଲ୍ଲାର ନୂଆ ମୁଖ୍ୟ ଭାବେ ଚୟନ ହୋଇଛନ୍ତି ନୈମ କ୍ୱାସୀମ। ବର୍ତ୍ତମାନ ସେ ହେଜବୁଲ୍ଲାର ଉପ ମହାସଚିବ ଓ ସେକେଣ୍ଡ ଇନ କମାଣ୍ଡ ଭାବେ କାମ କରୁଛନ୍ତି।
ବରିଷ୍ଠ ଓ ଅଭିଜ୍ଞତା ଦୃଷ୍ଟିରୁ ସେ ହେଜବୁଲ୍ଲାର ମୁଖ୍ୟ ଭାବେ ଚୟନ ହୋଇଛନ୍ତି। ଇସ୍ରାଏଲ ଏୟାର ଷ୍ଟ୍ରାଇକରେ ହେଜବୁଲ୍ଲା ମୁଖ୍ୟ ଭାବେ କାମ କରୁଥିବା ହାସନ ନସ୍ରଲ୍ଲା ସେପ୍ଟେମ୍ବର ୨୭ରେ ପ୍ରାଣ ହରାଇଥିଲେ। ଏବେ ତାଙ୍କ ସ୍ଥାନ ନୈମ କ୍ୱାସୀମ ନେବେ।
ସଂଗଠନ ପକ୍ଷରୁ ଜାରି ବିବୃତିରେ କୁହାଯାଇଛି ଯେ ହେଜବୁଲ୍ଲାର ଶୁରା ପରିଷଦ ୭୧ ବର୍ଷୀୟ କ୍ୱାସୀମଙ୍କୁ ମହାସଚିବ ଭାବେ ନିଯୁକ୍ତ କରିଛି। ୧୯୯୧ ମସିହାରୁ ସେ ସଂଗଠନ ଉପ ମହାସଚିବ ଭାବେ କାର୍ଯ୍ୟ କରୁଛନ୍ତି। ଏବେ ତାଙ୍କୁ ସଂଗଠନର ମୁଖ୍ୟ ଭାବେ ନିଯୁକ୍ତ କରାଯାଉଛି।
